Ingabo za Nigeria za Operation Hadin Kai hamwe n’Ishami ry’Ingabo z’Ikirere zatsinze igitero cyateguwe n’abarwanyi b’umutwe wa ISWAP (Islamic State West Africa Province) ku mujyi wa Damboa, aho bishe abarwanyi 16 mu mirwano yabaye mu ijoro ryakeye.

Sponsored Ad

Ibi byatangajwe mu butumwa bwashyizwe ku rubuga X na Zagazola Makama, inzobere mu kurwanya inyeshyamba, aho yatangaje ko igitero cyabaye ahagana saa saba z’ijoro (1:00 a.m.) ku wa Kane.

Damboa, iherereye mu majyepfo ya Borno, yakunze kugabwaho ibitero n’umutwe wa ISWAP kubera ari ahantu haherereye ibikorwa bikomeye mu bya gisirikare.

Makama Yagize ati “Ahantu nyamukuru abarwanyi bari bagamije kwibasira ni ahari icyicaro cya brigade i Damboa, aho bateye ari benshi. Ariko ingabo zasubije mu buryo bukomeye zikoresheje intwaro ziremereye, bituma umubare munini w’abanzi bicwa,”

“Nibura imirambo 16 y’abarwanyi yatoraguwe nyuma y’iyo mirwano, kandi hari abandi benshi bikekwa ko bahunze bakomerekejwe n’amasasu. Ni agahinda, kuko abasirikare babiri bapfiriye mu rugamba ubwo barwanaga n’abo barwanyi.”

Makama yongeyeho ko abashinzwe iperere bemeje ko nubwo ingabo zabashije kugenzura uko ibintu byifashe, igisasu kimwe cyarashwe n’abarwanyi cyateje inkongi y’umuriro ahabitswe intwaro, bikangiza inyubako ebyiri. Gusa iyo nkongi yahise icogozwa vuba.

Yavuze kandi ko ibikorwa byo guhiga abarwanyi bahunze bikomeje, hamwe n’ibikorwa byo gusukura no guhashya intwaro mu duce twari dukikije aho byabereye.