Abakora umwuga wo gutwara abagenzi kuri moto mu Karere ka Nyagatare bagaragarijwe ko ibibazo byo guhererekanya ibinyabiziga bagiye bafatira mu makoperative yabo, bikandikwa mu mazina yabo bigiye gukemuka bitarenze ukwezi kwa gatandatu.

Sponsored Ad

Ni ikibazo cyagaragajwe n’abamotari bo muri ako Karere kuri uyu wa Gatatu tariki ya 28 Gicurasi 2025, mu biganiro bagiranye n’inzego zitandukanye zirimo Polisi, RURA na Minisiteri y’Ibikorwa Remezo.

Hari mu gikorwa cyo kubashishikariza kwita ku mutekano wo mu muhanda banakoresha kasike zujuje ubuziranenge.

Aba bamotari bagaragaje ko babangamirwa no kuba bararangije kwishyura ibinyabiziga bafatiye muri koperative zabo, nyamara kwiyandikishaho moto zabo bikaba byarananiranye.

Niyontwari Alex yagize ati: “Dufite ikibazo gikomeye kuba dutunze ibinyabiziga bititwa ibyacu kuko byananiranye gukoresha mitasiyo. Tujya gihinduza bakatubwira ko bitakunda kuko amakoperative twahozemo yasenyutse afite imyenda.

Tubirenganiramo kuko twe twarishyuye none tuba ingwate y’imyenda ya za koperative.”

Munyankindi Emmy na we yagize ati: “Turababaye rwose ubuyobozi mudufashe turebe uko twahabwa uburenganzira ku binyabiziga byacu. Ubu kubera ko uguze moto asabwa guhita ahinduza, njye nshaka kugurisha sinabona umukiliya kuko itari mu mazina yanjye.”

Minisiteri y’Ibikorwa Remezo, MININFRA ivuga ko hashyizweho ingamba zo kurangiza iki kibazo, abishyuye moto zabo bagakorerwa ihererekanya (mutation).

Eng. Byiringiro Alfred umujyanama mukuru mu bya tekinike muri MININFRA yagize ati: “Iki ni ikibazo kizwi cyatewe nuko mu gusesa amakoperative hari abari batarishyura bityo imyenda ikabarirwa ku banyamuryango bose.

Inzego zitandukanye zakiganiriyeho mu itsinda rigikurikirana, hafashwe umwanzuro ko uwishyuye azajya akurwa mu myenda rusange akagendera ku izina rye akandikwaho moto ye. Turabizeza ko ibi bikorwa bitarenze uku kwezi kwa gatandatu.”

Bivugwa ko iki kibazo gifitwe n’abamotari hirya no hino mu Gihugu, akaba ari yo mpamvu ibisubizo biri gushakirwa ku rwego rw’Igihugu.”