Perezida wa Repubulika y’u Rwanda, Paul Kagame, yafunguye ku mugaragaro inama ya kabiri ya Nuclear Energy Innovation Summit for Africa (NEISA 2026), iri kubera muri Kigali.

Iyi nama yafunguwe ku mugaragaro kuri uyu wa 19 Gicurasi 2026, yitabiriwe n’abayobozi bakomeye barimo Faure Essozimna Gnassingbé, Perezida w’Inama Nkuru ya Togo, Samia Suluhu Hassan, Perezida wa Tanzania, ndetse na Rafael Mariano Grossi, Umuyobozi Mukuru w’Ikigo Mpuzamahanga gishinzwe Ingufu za Nikeleyeri (IAEA).

NEISA 2026 yahurije hamwe abakuru b’ibihugu na za Guverinoma, abashinzwe kugenzura urwego rw’ingufu za Nikeleyeri, abafatanyabikorwa mu by’imari, abayobozi b’inganda ndetse n’impuguke mu ikoranabuhanga, bagamije kuganira ku buryo bufatika bwo guteza imbere gahunda z’ingufu za Nikeleyeri muri Afurika.

Iyi nama iri kwibanda ku mahirwe Afurika ifite mu gukoresha ingufu za Nikeleyeri nk’umuti w’ibibazo by’ingufu zikenewe mu iterambere ry’inganda, ikoranabuhanga ndetse n’imibereho y’abaturage muri rusange.

U Rwanda rukomeje kugaragaza ubushake bwo kuba kimwe mu bihugu bya Afurika biyoboye ibiganiro n’ishoramari mu rwego rw’ingufu za Nikeleyeri, mu rwego rwo kongera ubushobozi bwo kubona amashanyarazi ahagije kandi arambye.