Polisi yo muri Uganda yataye muri yombi umushoferi wa taxi wafashwe atwaye abagenzi barenze urugero, ibintu byashyize ubuzima bwabo mu kaga.

Uyu mushoferi yafatiwe mu gace ka Nsangi ku wa Gatatu, atwaye imodoka yo mu bwoko bwa Toyota Hiace, ifite nimero za pulake UAG 660Q.

Nk’uko byatangajwe n’umuvugizi wa Polisi y’Umuhanda, SP Michael Kananura, iyi taxi yari itwaye abarenga 30, barimo abafana b’umupira w’amaguru ndetse n’abanyeshuri, aho bamwe bari bicaye hejuru y’imodoka, abandi bafashe ku madirishya.

Kananura yabitangaje abinyujije ku rubuga X (Twitter) aho yagize ati: “Iyi modoka yari itwaye abagenzi mu buryo budakwiye, bamwe bicaye hejuru, abandi bari bafashe ku madirishya. Polisi yahise iyihagarika, umushoferi atabwa muri yombi kandi ari mu maboko y’ubutabera,”

Yakomeje avuga ko ibikorwa nk’ibi bigomba kwamaganwa kuko bihonyora amategeko y’umuhanda kandi bishyira ubuzima bw’abagenzi mu kaga. Uyu mushoferi azagezwa imbere y’urukiko kugira ngo akurikiranwe n’amategeko.