Abarwanyi b’umutwe w’iterabwoba wa ADF ukorera muri Repubulika Iharanira Demokarasi ya Congo bishe abantu 18 muri Teritwari ya Lubero muri Kivu y’Amajyaruguru.

Radio Okapi yavuze ko iki gitero abarwanyi ba ADF bakigabye mu mpera z’icyumweru gishize, bagatera aborozi bari mu nzuri nyuma bakigabiza igiturage.

Sosiyete Sivili ivuga ko abarwanyi ba ADF binjiye muri gurupuma ya Bapakombe muri Teritwari ya Lubero bakica abaturage bamaze kuba 18, inzu nyinshi zigatwikwa abandi bakaburirwa irengero, bikekwa ko bashimuswe n’abo barwanyi mu birindiro.

ADF ni umutwe w’iterabwoba uvuga ko urwanya ubutegetsi bwa Uganda ariko ukaba umaze imyaka irenga 20 ukorera mu mashyamba ya Repubulika Iharanira Demokarasi ya Congo.

Abarwanyi bayo bazengereje abaturage dore ko ihora ibagabaho ibitero byisubiramo, haba mu ngo, mu nsengero ndetse no mu bitaro.

Kuva mu Ugushyingo 2021, ingabo za Uganda (UPDF) n’iza Congo (FARDC) zatangije ibikorwa bya gisirikare byiswe ‘Operation Shujaa’ bigamije kugaba ibitero bihambaye ku barwanyi ba ADF, no gusenya ibirindiro byayo ariko bisa naho ntacyo byagabanyije ku bukana bwawo.