Urwego rw’Igihugu rw’Iterambere (RDB) rwatangaje ibiciro bishya byo gusura ingagi muri Pariki y’Igihugu y’Ibirunga, bizatangira gukurikizwa mu mwaka wa 2026.
Ni mu itangazo RDB yashyize hanze kuri uyu wa Mbere, tariki ya 5 Mutarama 2026, babinyujije ku rubuga rwayo rwa X.
RDB yatangaje ko ku Banyarwanda n’abandi baturage baturutse mu bihugu bigize Umuryango wa Afurika y’Iburasirazuba (EAC), igiciro cy’uruhushya rwo gusura ingagi cyashyizwe ku madolari 200.
Aba ba mukerarugendo (…)

Urwego rw’Igihugu rw’Iterambere (RDB) rwatangaje ibiciro bishya byo gusura ingagi muri Pariki y’Igihugu y’Ibirunga, bizatangira gukurikizwa mu mwaka wa 2026.

Ni mu itangazo RDB yashyize hanze kuri uyu wa Mbere, tariki ya 5 Mutarama 2026, babinyujije ku rubuga rwayo rwa X.

RDB yatangaje ko ku Banyarwanda n’abandi baturage baturutse mu bihugu bigize Umuryango wa Afurika y’Iburasirazuba (EAC), igiciro cy’uruhushya rwo gusura ingagi cyashyizwe ku madolari 200.

Aba ba mukerarugendo bakazajya basabwa kuba bitwaje indangamuntu cyangwa pasiporo igifite agaciro, hamwe n’icyemezo cy’amavuko.

Abaturage bo mu bindi bihugu bya Afurika bazajya bishyura amadolari 500, ubundi basabwe kwitwaza pasiporo igifite agaciro, indangamuntu y’igihugu bakomokamo cyangwa ikarita y’umudipolomate, ndetse na viza imara nibura amezi ane akurikirana.

Ibi biciro bishya byashyizweho mu gihe ibiciro bisanzwe kuri ba mukerarugendo baturuka mu bihugu by’amahanga cyari amadolari 1,500.

RDB ivuga ko ibi biciro bishya bizakoreshwa kugera ku wa 31 Ukuboza 2026, icyakora ntabwo bizakorwshwa mu mezi haba hari ubukerarugendo bwinshi hagati ya Kamena kugeza mu Ukwakira 2026.

Ni imyanzuro yashyizweho hagamijwe gushyigikira iterambere ry’ubukerarugendo burambye, kurengera ingagi n’ahantu ziba, no gukomeza guteza imbere imibereho myiza y’abaturage batuye hafi ya pariki, binyuze mu nyungu ziva mu bukerarugendo.

Pariki y’Igihugu y’Ibirunga, iherereye mu Karere ka Musanze mu Majyaruguru y’u Rwanda, ni imwe mu hantu h’ingenzi kuko hacumbikiye ingagi ziri mu nyamanswa zari zitangiye kuzimira mu myaka yashize.

RDB yongeye gushimangira ko izakomeza gukorana n’abafatanyabikorwa batandukanye mu rwego rwo guteza imbere ubukerarugendo, guteza imbere ubukungu bw’igihugu, no kurengera umutungo kamere w’u Rwanda, by’umwihariko Pariki y’Igihugu y’Ibirunga n’ingagi ziyibarizwamo.