Abasirikare icyenda ba Repubulika Iharanira Demokarasi ya Congo, bakorera mu bice bitandukanye by’intara ya Kivu y’Amajyaruguru, batawe muri yombi bazira kwiba ibiryo bya bagenzi babo.

Aba basirikare barimo batanu bafite amapeti ari ku rwego rwa Colonel: Col Ngongo Makuba Sadam uyobora Rejima ya 3414, Col Bigaya Lokasa wa Rejima ya 2102, Col Senzira Rugara Joseph wa Rejima ya 1303, Lt Col Bongolo Edepame Gabriel na Lt Col Maroyi Kabamba Didy.

Abandi ni Capt Bihango Muliro Alexis ukorera muri Rejima ya 3414, Capt Motambo Dalton wa Rejima ya 2102, Adjudant Bohete Kilasi wa Rejima ya 1202 na Balonoso Judo.

Umuyobozi ushinzwe ibikorwa by’ingabo za RDC muri Kivu y’Amajyaruguru, Brig Gen Mugisa Muleka Joseph yasobanuye ko aba basirikare bibye imifuka 250 y’ifu y’ibigori, imifuka 80 y’umuceri n’imifuka ine y’amata, barayigurisha.

Brig Gen Mugisa yagaragaje ko abaguze ibi biribwa ari abasivili babiri: Katembo Jean Paul na Mbusa Madirisa. Aba bombi na bo batawe muri yombi.

Ku wa 6 Ugushyingo, aba basirikare boherejwe ku biro bya zone ya 3 y’ingabo za RDC biherereye mu mujyi wa Kisangani mu ntara ya Tshopo kugira ngo bahacumbikirwe mu gihe bakurikiranywe.