Umutwe witwaje intwaro wa M23 n’Ihuriro ry’ingabo za Repubulika Iharanira Demokarasi ya Congo byiriwe mu mirwano mu Mujyi wa Sake na Mweso muri teritwari ya Masisi kuri uyu wa 25 Mutarama 2025.

Ihuriro ry’Ingabo za RDC rigizwe n’abasirikare b’iki gihugu (FARDC), FDLR n’imitwe ya Wazalendo byagabye ibitero ku birindiro bya M23, bigamije kuyikuramo.

Umunyamakuru uri hafi y’ahari kubera imirwano yatangaje ko ibitero by’iri huriro byatangiye ku wa 23 Mutarama bitari gukura M23 mu byimbo byayo muri Sake na Mubambiro.

Yagize ati “Uyu munsi na none, imirwano yakomeje mu bice bikikije Sake. Ku bw’ibyago, izi nyeshyamba ziracyagenzura Sake na Mubambiro.”

Telesphore Mitondeke uri mu buyobozi bwa sosiyete sivili ikorera muri Masisi, yatangarije ikinyamakuru Actualité ati “Habayeho kurasana cyane, bitera abaturage ubwoba. FARDC na Wazalendo bashaka kwisubiza ibice byinshi.”

Ingabo ziri mu butumwa bw’amahoro bw’Umuryango w’Abibumbye muri RDC (MONUSCO) n’iz’Umuryango wa Afurika y’Amajyepfo (SAMIDRC) na zo ziri kwifatanya muri iyi mirwano n’ihuriro ry’iza RDC.

MONUSCO na SAMIDRC biri kwifatanya ahanini mu kugerageza gukura abarwanyi ba M23 mu Mujyi wa Sake no kurindira Umujyi wa Goma mu nkengero zawo.