Raporo nshya y’Ishami ry’Umuryango w’Abibumbye ryita ku bana (UNICEF), igaragaza ko ihohoterwa rishingiye ku gitsina rikorerwa abana rimaze gushinga imizi muri Repubulika Iharanira Demokarasi ya Congo ndetse rikomeje kwiyongera, itanga impuruza kuri iki kibazo.

Itangwa ry’impuruza ryashingiye ku mibare yakusanyijwe n’abatanga serivisi zo kurinda no gufasha abakorewe ihohoterwa rishingiye ku gitsina muri UNICEF, aho iyi mibare igaragaza ko mu mezi icyenda ya mbere ya 2025 hamenyekanye abana barenga 35.000 bakorewe ihohoterwa rishingiye ku gufatwa ku ngufu n’ibindi bikorwa nka byo.

Iyo Raporo igaragaza ko mu 2024 iryo hohoterwa ryakorewe abana hafi 45.000 bingana hafi na 40% by’ibyaha byose by’ihohoterwa rishingiye ku gitsina byatangajwe muri uwo mwaka, imibare yikubye inshuro eshatu ugereranyije no mu 2022.

UNICEF igaragaza ko imibare nyayo ishobora kuba irenze iyatangajwe, bitewe n’uko hari byinshi bitamenyekanye kubera ubwoba, guhezwa, umutekano muke n’uburyo bwo kugera kuri izo serivisi.

Umuyobozi Mukuru wa UNICEF yongeraho ko gutinya guhezwa n’ibihano kenshi bibuza imiryango gutanga amakuru ku byabaye, ari yo ntandaro y’ibi bikorwa

Ati “Ababyeyi bagenda amasaha menshi bajyanye abakobwa babo ku bigo nderabuzima, bamwe batagishobora kugenda nyuma yo gufatwa ku ngufu”

UNICEF ivuga ko ibirego byinshi byiganje mu Ntara za Kivu y’Amajyaruguru n’iy’Amajyepfo ndetse na Ituri, aho intambara, kwimurwa kw’abaturage n’umutekano muke uba muri utwo duce byongereye ibyo bikorwa.

Hari kandi imibare igaragara i Kinshasa no mu Ntara ya Kasai na ho byazamutse bitewe n’ubukene, ibura ry’ibiribwa n’abana bata ishuri.

Iyi raporo igaragaza ko abakobwa b’abangavu ari bo bibasirwa cyane mu gihugu hose. Abahungu na bo bakorerwa ihohoterwa rishingiye ku gitsina, ariko ntibakunze kugaragazwa mu mibare itangazwa. Abana bafite ubumuga na bo bibasirwa n’ibi bikorwa bitewe n’imbogamizi z’umubiri, iz’imibereho n’itumanaho, bikagabanya n’uburyo bagera kuri serivisi z’ubuvuzi n’ubutabera.

Hagati ya 2022 na 2024, umubare w’abana bafashijwe na UNICEF muri RDC wiyongereyeho 143%, ugera ku bana barenga 24.200 mu 2024 mu ntara zibasiwe cyane.

UNICEF ivuga ko hagati muri 2025, 23% gusa by’ibikorwa byo kurwanya ihohoterwa rishingiye ku gitsina ari byo byabashije guterwa inkunga; imibare yagabanyutse ugereranyije na 48% mu 2022, ibikomeza gushyira abana ibihumbi n’ibihumbi mu byago, barimo abarenga 300.000 bo mu bice byo mu burasirazuba bw’iki gihugu byibasiwe n’intambara.