Minisiteri y’Ububanyi n’Amahanga y’u Rwanda yatangaje ko Igihugu cya Repubulika Iharanira Demokarasi ya Congo cyongeye gushaka gukomanyiriya u Rwanda ngo ntiruhabwe kuyobora Inama y’Abaminisitiri y’Ikigo cyo mu Karere ka Afurika gishinzwe kurwanya ikwirakwizwa ritemewe ry’Intwaro (RECSA), ariko biba iby’ubusa ruratorwa.

Sponsored Ad

Ni inshingano rwahawe ku wa Gatanu tariki ya 13 Kamena 2025, rusimbuye Kenya, i Nairobi muri Kenya ahari hateraniye Inama ya 11 ya RECSA. U Rwanda rwahagarariwe na Minisitiri w’Umutekano mu Gihugu, Dr Vincent Biruta.

Abinyujije ku mbuga nkoranyambaga ze, kuri uyu wa Gatandatu tariki ya 14 Kamena 2025, Minisitiri w’Amahanga n’Ubutwererane Mpuzamahanga w’u Rwanda, Amb Olivier Jean Patrick Nduhungirehe yahishuye ko RDC yari ifite umugambi wo gukomanyiriza u Rwanda ngo rudatorwa ariko uwo mugambi mubi ntiwayihira.

Yagize ati: “Ni byiza kumenya ko RDC yongeye kugaragaza imyitwarire yo kurwanya ko u Rwanda ruyobora RECSA. Ariko ku bw’amahirwe, amashyirahamwe y’akarere muri Afurika yose, ntashobora guteshwa agaciro cyangwa kugengwa n’ubutegetsi bwa Kinshasa buri mu rungabangabo.”

RDC ikomeje umugambi wayo, kuko u Rwanda ruherutse kwikura mu Muryango w’Ubukungu w’Ibihugu byo muri Afurika yo Hagati CEAC, bitewe na yo yarwitambitse mu gihe rwe rutahiwe kuyobora uwo Muryango. Ibyo kuruvutsa kuyobora RECSA byo ntibyayihiriye.

Mu muhango wo guhererekanya ububasha ku buyobozi bwa RECSA, Umunyamabanga wa Leta ushinzwe umutekano imbere mu gihugu wa Kenya, Kipchumba Murkomen, yahaye Minisitiri Dr. Vincent Biruta, ibendera rya RECSA hamwe n’ibikoresho bigize ishingiro ry’uyu muryango.

U Rwanda ruzafatanya kuyobora n’igihugu cya Tanzaniya, kizaba kirwungirije ku buyobozi.

Mu ijambo rye ubwo yakiraga inshingano, Dr. Biruta yemeje ko u Rwanda rwiyemeje kongerera ingufu uruhare rwa RECSA nk’inkingi y’ubufatanye bw’Akarere mu guhangana n’ibibazo bituruka ku ikwirakwizwa ry’intwaro nto n’izoroheje (SALW).

Yijeje ubufasha bwuzuye Ubunyamabanga Bukuru bwa RECSA, harimo no guharanira ko bubona ubushobozi buhagije bwo kuzuza inshingano zabwo neza.

Dr. Biruta yanagarutse ku gukomera ku mutekano w’intwaro nto n’izoroheje bijyanye n’ibibazo by’Isi bikomeje kuvuka, birimo ikoranabuhanga rishya n’ihindagurika ry’ibihe.

Yasabye ko hashyirwaho uburyo bushya bwo guhangana n’ingaruka za SALW kugira ngo ibisubizo bitangwa bikomeze kuba ingirakamaro kandi bifite ireme.

Inama y’Abaminisitiri ni rwo rwego rw’ikirenga ruyobora RECSA. Igizwe n’Abaminisitiri bashinzwe umutekano imbere mu gihugu, cyangwa abandi bayobozi bashyizweho n’ibihugu bigize uwo muryango.

Umuryango w’Akarere ushinzwe Intwaro nto n’Izoroheje (REC (RECSA), ufite inshingano nyamukuru zo kongerera ubushobozi ibihugu biwugize no guhuza ishyirwa mu bikorwa ry’Amasezerano ya Nairobi arebana no gukumira, kugenzura no kugabanya ikoreshwa ry’intwaro nto n’izoroheje mu Karere k’Ibiyaga Bigari, mu Ihembe rya Afurika no mu bihugu bihana imbibi n’ako karere.

RECSA yashinzwe muri Kamena 2005, hashingiwe ku byemezo byafashwe mu nama ya gatatu y’abaminisitiri bagenzura ishyirwa mu bikorwa ry’ayo masezerano.