Ikigo cy’Igihugu gishinzwe Iterambere ry’Ubuhinzi n’Ubworozi mu Rwanda (RAB), cyatangaje ko cyakuyeho akato kari karashyizweho mu kwirinda ikwirakwira cy’icyorezo cy’uburenge mu matungo yororerwa mu mirenge ya Kanama, Nyakiliba na Kanzenze yo mu Karere ka Rubavu.

RAB yatangaje ko iki cyemezo gishingiye ku Itegeko rigenga uburyo bwo kwirinda no kurwanya indwara zandura amatungo mu Rwanda, mu ngingo yaryo ya 2 n’iya 49 isobanura akato ku ndwara y’uburenge n’uburyo kavanwaho.

RAB yagaragaje ko imaze kubona ko ingamba zirebana no gukumira no kwirinda ikwirakwizwa ry’Indwara y’Uburenge yagaragaye mu nka zafatiwe mu ishyamba rya Muhungwe rikora ku mirenge ya Kanama, Nyakiriba na Kanzenze yo mu karere ka Rubavu zashyizwe mu bikorwa uko bikwiye, ko nta tungo ryagaragayeho ibimenyetso by’indwara y’uburenge mu minsi 21 nyuma yo gushyiraho ingamba zikumira ikwirakwizwa ry’iyi ndwara.

Bivuze ko icyemezo cyari cyafashwe cyo guhagarika ingendo z’amatungo afite ibinono (inka, ihene, intama n’ingurube) ku mpamvu iyo ari yo yose (kororwa, kugurishwa, kubagwa) no guhagarika icuruzwa ry’ibikomoka kuri ayo matungo muri iyo mirenge cyavanyweho.

Ubuyobozi bw’inzego z’ibanze n’aborozi barasabwa gukomeza kwita ku buzima bw’amatungo no gutanga amakuru igihe cyose hagaragaye ikibazo.

RAB yongeye kwibutsa abaturage n’inzego z’ibanze ko kororera mu ishyamba rya Muhungwe bitemewe kandi ko ingendo z’amatungo zikorwa hakoreshejwe ibinyabiziga, zigakorwa ku manywa.

Yaboneyeho umwanya wo gusaba Komite z’aborozi, Inzego z’ubuyobozi n’Inzego z’Umutekano gukomeza gukurikirana hafi kubahiriza no gushyira mu bikorwa ibikubiye muri iri tangazo.

Umunyamabanga nshingwabikorwa w’Umurenge wa Kanzenze, Uwizeyimana Josiane mu kiganiro na IGIHE yatangaje ko bishimye cyane kuba bakomorewe.

Ati: "Isoko ry’amatungo rirarema mu gitondo, byari biduhangayikishije cyane yaba ku ruhande rw’ubuyobozi ndetse n’aborozi muri rusange, ubu turishimye cyane."

Isoko ry’amatungo rya Kanzenze rirema buri wa Mbere w’icyumweru, ndetse ryinjiriza Akarere ka Rubavu imisoro irenga miliyoni 2 Frw, buri uko ryaremye.