Inzego z’umutekano zafashe umugabo wo mu Murenge wa Musha, Akarere ka Rwamagana, ukekwaho kwica umugore we nyuma yo kumukubita ikibando mu mutwe.

Ibi byabereye mu Mudugudu w’Akabare, Akagari k’Akabare, mu rukerera rwo kuri uyu wa Gatatu tariki ya 15 Nyakanga 2026 nkuko UKWELITIMES ubivuga.

Amakuru yemejwe n’Umunyamabanga Nshingwabikorwa w’Umurenge wa Musha, Karahamuheto Claudios, agaragaza ko mbere y’ubwo bwicanyi, aba bombi babanje kugirana amakimbirane, gusa icyayateye n’ibindi bisobanuro biracyari gukorwaho iperereza.

Yavuze ko nyuma yo gukekwaho gukora icyo cyaha, uwo mugabo yagerageje gutoroka, ariko aza gufatirwa hafi y’ikiyaga cya Muhazi mbere y’uko abasha kugenda.

Kuri ubu ukekwaho ubwo bwicanyi afungiye kuri Sitasiyo ya RIB ya Musha, mu gihe iperereza rikomeje kugira ngo hamenyekane imvo n’imvano y’amakimbirane yagejeje kuri uru rupfu.

Inzego zibishinzwe zakomeje gukusanya amakuru kugira ngo ukuri kose kuri iki kibazo kumenyekane, mbere y’uko dosiye ishyikirizwa ubushinjacyaha.