Guverinoma y’u Rwanda n’iya Togo byasinye amasezerano yo gukuriranaho gusaba visa ku baturage b’ibihugu byombi bafite pasiporo z’ubwoko butandukanye.

Ni amasezerano yashyizweho umukono ku wa 16 Mutarama 2026, na Minisitiri w’Ububanyi n’Amahanga w’u Rwanda Amb Olivier Nduhungirehe na mugenzi we wa Togo, Prof Robert Dussey.
Ubutumwa bwashyizwe hanze na Minisiteri y’Ububanyi n’Amahanga y’u Rwanda bugaragaza ko aya masezerano ari ayo gukuriranaho kwaka visa abaturage bafite pasiporo z’ubwoko bwose.

Hagati ya tariki ya 18 na 19 Mutarama, 2025, Perezida Faure Essozimna Gnassingbé wa Togo, yagiriye uruzinduko mu Rwanda rwari rugamije kurushaho guteza imbere imibanire y’ibihugu byombi, binyuze mu kwihutisha ishyirwa mu bikorwa ry’ibyemeranyijweho ndetse no gushaka izindi nzego z’imikoranire.

Perezida Faure Essozimna Gnassingbé yari aherekejwe n’itsinda rigari ry’abayobozi muri Togo bari mu nzego zo hejuru, aba bakaba baragize umwanya wo kuganira na bagenzi babo bo mu Rwanda mu rwego rwo kurebera hamwe uburyo impande zombi zarushaho kwihutisha iterambere mu nzego zinyuranye.

Icyo gihe Perezida Kagame na Perezida Faure bashimiye umubano mwiza usanzwe hagati y’u Rwanda na Togo, ndetse biyemeza gukomeza kwagura iyi mikoranire iri mu nzego za politiki, ubukungu n’imibanire.

Aba bayobozi kandi basabye inzego bireba, kwihutisha irangizwa ry’ibyemeranyijweho, birimo gukorana mu buryo bwagutse, gushyiraho komisiyo ihuriweho, kugirana ibiganiro bya politiki, gukuraho visa no guhagarika gusoresha kabiri ku mpande zombi.

Amasezerano hagati y’impande zombi yashyinzweho umukono na ba Minisitiri b’Ububanyi n’Amahanga