Guverinoma ya Sénégal yateguye umushinga w’itegeko rigamije gukaza ibihano bihabwa abahamywa kuryamana n’abo bahuje ibitsina n’ababishinja abandi nta bimenyetso babifitiye.

Uyu mushinga ugamije guca imyitwarire Guverinoma ihamya ko idakwiye ikiremwamuntu, uvuga ko igihano ku bahamywa kuryamana n’abo bahuje ibitsina kizava ku gifungo cy’imyaka itanu kigere ku myaka 10, ihazabu igere kuri miliyoni 10 z’Ama-CFA (Amadolari 17.979) ivuye kuri miliyoni 1,5 z’Ama-CFA (Amadolari 2696,8).

Si abantu ku giti cyabo barebwa n’uyu mushinga w’itegeko kuko imiryango ishishikariza abaturage ba Sénégal kujya mu bikorwa by’abaryamana n’abo bahuje ibitsina izakomanyirizwa mu buryo burenze ubwari busanzwe.

Minisitiri ushinzwe umuco, Amadou Ba, yatangaje ko abamamaza ingengabitekerezo y’abaryamana n’abo bahuje ibitsina binyuze muri filime, gahunda za televiziyo, inyandiko n’ibindi na bo bagongwa n’uyu mushinga w’itegeko.

Guverinoma ya Sénégal igaragaza ko kwitwa umuntu uryamana n’abo muhuje ibitsina nta bimenyetso bigaragazwa ari ihohoterwa rikomeye. Uyu mushinga ugaragaza ko uzabishinja mugenzi we kandi nta bimenyetso, azakatirwa igifungo kitari munsi y’imyaka ibiri ariko kitarenze imyaka itatu.

Uyu mushinga ugaragaza ko uretse iki gifungo, umuntu uzashinja undi kuryamana n’uwo bajuje ibitsina, azanacibwa ihazabu y’Ama-CFA atari munsi ya 200.000 (Amadolari 359,5) ariko atarenze 500.000 (Amadolari 898,9).

Biteganyijwe ko uyu mushinga uzagezwa mu Nteko Ishinga Amategeko, niwemeza ni bwo uzahinduka itegeko. Bizashoboka cyane ko nuba itegeko, Perezida Bassirou Diomaye Faye azarishyiraho umukono kuko ishyaka rye, Pastef, rirawushyigikiye.