Kuri uyu wa Kabiri, itariki 29 Ukwakira 2024, Minisiteri y’Ububanyi n’Amahanga ya Leta Zunze Ubumwe za Amerika yatangaje ko yamaganye ibitero byibasira abasivili by’ingabo za Rapid Support Forces muri Sudani kandi ibahamagarira guhagarika ihohoterwa rikorerwa abaturage.

Ibi byatangajwe nyuma y’ubwicanyi bumaze iminsi buvugwa kuva ku wa Gatanu muri Leta ya al-Jazira, kugeza ubu yari ituje. Minisitiri w’ubuzima wa Sudani avuga ko abarwanyi ba RSF bamaze guhitana abantu barenga 120 mu mujyi umwe wonyine.

Umuvugizi wa Minisiteri y’Ububanyi n’Amahanga ya Leta Zunze Ubumwe za Amerika, Matthew Miller, yaburiye mu nama isanzwe yo gutanga amakuru, ko Amerika izakomeza gukurikiranira hafi abahembera ubugizi bwa nabi muri Sudani nk’uko tubikesha Ibiro Ntaramakuru Reuters.

Ku rundi ruhande, kuri uyu wa Kabiri, Umuyobozi w’Umuryango Mpuzamahanga w’abinjira n’abasohoka wavuze ko abantu barenga miliyoni 14 bataye ingo zabo muri Sudani, haba mu gihugu cyangwa hakurya y’imipaka yacyo, aho abantu bagera ku 200.000 bahunze kuva mu kwezi gushize.