Ihuriro ry’ibihugu birenga 20 ryaburoye ko hashobora kuba ubwicanyi bukomeye vuba muri Sudani, rivuga ko abasivile bagera ku 500.000 bashobora gushyirwa mu kaga mu gihe imirwano irimo kwiyongera mu nkengero z’umujyi wa El Obeid, mu ntara ya North Kordofan.

Iri huriro riharanira gukumira ibyaha ndengakamere no kwimakaza ubutabera muri Sudani (Coalition for Atrocity Prevention and Justice for Sudan) rivuga ko nibura abasivile 50 bamaze kwicwa mu minsi icumi ishize, biciwe mu bitero bya drones byagabwe kuri El Obeid no mu gace ka North Kordofan.

Rinavuga ko hari “amakuru yizewe y’ubwicanyi bushingiye ku moko, harimo n’ihohotera rishingiye ku gitsina ndetse n’irishingiye ku gitsina cy’umuntu (igitsina gore cyangwa gabo)”.

Iryo huriro ryongeyeho ko abantu barenga 100.000 bamaze guhunga ingo zabo imbere mu gihugu bashobora kurushaho gushyirwa mu kaga mu gihe imirwano yakomeza gukara.

Rivuga riti: “Turahamagarira umutwe wa Rapid Support Forces guhagarika ako kanya ibitero kuri El Obeid,” risaba kandi impande zose ziri mu mirwano kugabanya ibikorwa by’intambara no kubahiriza amategeko mpuzamahanga agenga ubutabazi mu bihe by’intambara.

Rinasaba kandi amahanga kongera igitutu ku mpande ziri mu mirwano kugira ngo hakumirwe ibindi bikorwa by’ubwicanyi n’ibyaha ndengakamere.

Iri tangazo rije mu gihe Umuryango w’Abibumbye (ONU) na wo uherutse kugaragaza impungenge zikomeye ku makuru avuga ko hashobora kugabwa igitero cyo ku butaka cyibasira El Obeid, umwe mu mijyi ifite akamaro kanini mu bikorwa by’ubutabazi n’ubucuruzi muri Sudani.

Intambara hagati y’umutwe wa gisirikare wa Rapid Support Forces n’ingabo za Leta ya Sudani imaze imyaka irenga itatu.

Nubwo umubare nyawo w’abamaze kwicwa utaramenyekana, bikekwa ko nibura abantu 150.000 bamaze kwicwa, ndetse ko bashobora no kuba bagera ku 400.000. Abantu barenga miliyoni 11 bamaze kuva mu byabo.