Itsinda ry’impirimbanyi za demokarasi kuri uyu wa Kane ushize ryatangaje ko byibuze abasivili 15 bishwe abandi benshi barakomereka mu gitero cyagabwe n’ingabo za Rapid Support Forces (RSF) muri El Fasher, umurwa mukuru wa Leta ya Darfur y’Amajyaruguru mu burengerazuba bwa Sudani.

Sponsored Ad

Komite zishinzwe kwirwanaho muri El Fasher zasangije amafoto ku rubuga rwabo rwa Facebook zerekana ibyangiritse ku ngo z’abaturage zatewe n’ibitero bya bombe.

Guverineri wa Darfur, Minni Minnawi, mu nyandiko yanditse ku rubuga rwa X, yavuze ko iki gitero ari “icyaha gikomeye kandi cy’iterabwoba cyiyongereye ku bimaze gukorwa na RSF.”

Yavuze ko “ku wa Kane, RSF yagabye ibitero bya bombe bikomeye muri El Fasher, byibasira abaturage badafite imbunda mu ngo zabo, mu isoko ry’amatungo mu burengerazuba bw’umujyi, ndetse no mu baturanyi ba Al Radif na Al-Thawra, biviramo gupfa abagera kuri mirongo ndetse benshi barakomereka, ”nubwo atagaragaje umubare nyawo w’abapfuye.

RSF ntacyo yatangaje kuri icyo gitero nk’uko iyi nkuru dukesha Anadolu Agency ikomeza ivuga.

Kuva ku itariki ya 10 Gicurasi, El Fasher niho habereye imirwano hagati y’ingabo za Sudani na RSF, n’ubwo imiryango mpuzamahanga yaburiye kwirinda imirwano ibera muri uyu mujyi, usanzwe ari ihuriro ry’ibikorwa by’ubutabazi mu karere kanini ka Darfur.

Loni ivuga ko kuva hagati muri Mata umwaka ushize, Ingabo za Sudani na RSF bari mu ntambara imaze guhitana abantu 18.800 no kuvana mu byabo abantu bagera kuri miliyoni 10.