Ku wa Kabiri, itariki ya 6 Gicurasi, Sudani yahagaritse umubano w’ububanyi n’amahanga na Leta Zunze Ubumwe z’Abarabu, nyuma yo gushinja UAE kuba yarahaye ingabo za Rapid Support Forces indege zitagira abadereva zibasiye Port Sudani, ahari icyicaro cy’agateganyo cya guverinoma, mu minsi itatu ishize.

Sponsored Ad

Kuri televiziyo y’igihugu, Minisitiri w’ingabo, Yassin Ibrahim yagize ati: “Isi yose imaze imyaka irenga ibiri ikurikirana icyaha cy’ubushotoranyi ku busugire bwa Sudani, ubusugire bw’akarere ndetse n’umutekano w’abaturage bayo, byakozwe na Leta Zunze Ubumwe z’Abarabu binyuze mu bafatanyacyaha babo hano.”

Yashinje UAE kuba yarahaye “intwaro ziteye ubwoba” ingabo za Rapid Support Forces (RSF), ziyobowe na Gen. Mohamed Hamdan Daglo, wigumuye ku Mugaba Mukuru w’Ingabo, Abdel Fattah al-Burhan muri Mata 2023.

Minisitiri w’ingabo yakomeje agira ati: “Igihe Leta Zunze Ubumwe z’Abarabu zabonaga ibikoresho byabo bigiye gutsindwa imbere y’ingabo zacu (…) bongereye inkunga yabo.” Sudani “izasubiza iki gitero hakoreshejwe uburyo bwose bukenewe kugira ngo igihugu kibungabunge ubusugire bwacyo”.

Yakomeje kandi asobanura ko “kubera ubwo bugizi bwa nabi bukomeje, Akanama gashinzwe Umutekano n’Ubwirinzi kiyemeje gutangaza ko Leta Zunze Ubumwe z’Abarabu ari igihugu cyabateye, bacanye umubano wa dipolomasi nazo ndetse ko hafunzwe Ambasade ya Sudani hamwe na consulat ya Sudani [muri Abu Dhabi].”

Iri tangazo rya Guverinoma ya Sudani rije nyuma y’umunsi umwe Urukiko Mpuzamahanga rw’Ubutabera, urukiko rukuru rw’Umuryango w’Abibumbye, ruteye utwatsi ikirego Sudani ishinjamo Abu Dhabi ubufatanyacyaha muri jenoside kubera ko ishyigikiye RSF.