Abaturage ba Syria bari barahunze intambara bari kugenda bagaruka mu gihugu cyabo, aho abarenga ibihumbi 30 bamaze gutahuka baturutse mu bihugu birimo Turikiya.

Syria yinjiye mu ntambara mu 2011 ubwo abaturage basabaga Perezida Bashir al-Assad kuva ku butegetsi akabyanga, akabashoramo ibisasu bikabarakaza kurushaho, bikarangira impande zombi zinjiye mu ntambara yamaze imyaka irenga 12.

Gusa nyuma y’uko ubutegetsi bwa Bashir buhiritswe n’umutwe wa HTS, abaturage benshi batangiye kugaruka mu gihugu, aho abarenga ibihumbi 30 batashye.

Gusa ikibabaje ni uko bari gusanga myinshi mu mitungo yabo yarangiritse cyane, abandi bagasanga imiryango yabo itakiriho, muri make bikaba gutangira ubuzima.

Iyi ntambara yatumye abaturage barenga miliyoni 6.5 bahungira hanze y’igihugu, abarenga miliyoni 6 bahungira imbere mu gihugu.