Ubuyobozi bwa Tanzania bwafunguye Abanya-Kenya batanu barimo n’abapolisi b’iki gihugu babiri bari batawe muri yombi, nyuma yo gufatwa barenze umupaka.

Aba Banya-Kenya barekuwe ku wa 7 Mutarama 2026, nyuma y’umunsi umwe bafatiwe mu gace ka Horohoro muri Tanzania, barenze umupaka.

Mu kwiregura, aba bapolisi bakorera kuri sitasiyo ya polisi ya Tononoka muri Kenya, bavuze ko bakurikiranye umuntu wari umaze gukorera icyaha muri Kenya bisanga barenze umupaka.

Bahise bafatwa na Polisi ya Tanzania ibashinja kwinjira ku butaka bwayo binyuranyije n’amategeko ndetse bafite intwaro.

Nyuma y’ibiganiro byahuje impande zombi, ku wa 7 Mutarama, Tanzania yarekuye aba Banya-Kenya, gusa igumana imodoka n’imbunda zabo mu gihe iperereza rikomeje.

Uretse aba bapolisi, hari hafashwe abandi bantu batatu barimo umushoferi w’ikigo cya leta wari ubatwaye, umukoresha we, ndetse n’umugore w’uyu mukoresha.

Tanzania yafunguye abapolisi ba Kenya yafashe barenze umupaka