Tanzaniya yahagaritse Inama za politike mu gihugu hose kugeza igihe hazatangarizwa indi myanzuro, ivuga ko ari mu rwego rwo kurinda umutekano w’igihugu.

Guverinoma yatangaje ko yafashe iki cyemezo nyuma yo kubona ibimenyetso by’uko umutekano ushobora guhungabana, harimo abantu bivugwa ko bafatanywe intwaro bakekwaho gutegura ibikorwa by’iterabwoba n’ibyaha.

Icyo cyemezo cyanenzwe n’imitwe itavuga rumwe na Leta, ivuga ko guhagarika inama zateguwe n’amashyaka binyuranyije n’Itegeko Nshinga. Ishyaka ritavuga rumwe n’ubutegetsi rya ACT Wazalendo ryatangaje ko rizajyana Leta mu nkiko risaba ko icyo cyemezo giteshwa agaciro.

Iki cyemezo gifashwe mu gihe hari hamaze gutangazwa imyigaragambyo yari iteganyijwe, igamije gusaba impinduka mu miyoborere ya demokarasi no kwibuka abantu bishwe mu guhasha imyigaragambyo yakurikiye amatora yabaye umwaka ushize.

Kongera guhagarika amakoraniro ya politiki bisobanuye kwisubiraho ku mpinduka zari zarakozwe na Perezida Samia Suluhu Hassan mu 2023, ubwo yavagaho icyemezo cyari kimaze imyaka itandatu kibuza ayo makoraniro. Icyo cyemezo cyari cyarashyizweho n’uwo yasimbuye, John Magufuli.

Icyo gihe, Samia Suluhu Hassan yari yavuze ko amashyaka ya politiki afite uburenganzira bwo gukora amakoraniro, ariko ayasaba kubikora mu buryo burangwa n’ubupfura no kwirinda gutukana.

Atangaza icyemezo cyo kongera guhagarika ayo makoraniro, Minisitiri w’Ubutegetsi bw’Igihugu, Patrobas Katambi, yabwiye Inteko Ishinga Amategeko ati: “Dukwiriye gushyira imbaraga mu kubaka ubukungu.”

Yongeyeho ko igihugu cyitegura kwakira imurikagurisha mpuzamahanga ry’ubucuruzi, rizitabirwa n’abashyitsi baturutse mu bihugu bitandukanye, bityo hakaba hakenewe kubungabunga umutekano n’ituze.