Umutwe witwaje intwaro wa MRDP-Twirwaneho urwanya ubutegetsi bwa Repubulika Iharanira Demokarasi ya Congo, watangaje ko wahanuye imwe muri drones z’ingabo z’iki gihugu ziri kwica Abanyamulenge batuye mu Ntara ya Kivu y’Amajyepfo.

Umuvugizi wa Twirwaneho, Col Kamasa Ndakize Welcome, yatangaje ko ku wa 15 Mutarama 2026 Ingabo za RDC, iz’u Burundi, FDLR na Wazalendo byagabye ibitero mu gace ka Point-Zéro kari mu bilometero 10 ugana muri Komini ya Minembwe.

Yagize ati "Iyi operasiyo yarimo ibitero byo ku butaka n’iby’indege zitagira abapilote, byibasiye ku bushake abatuye muri Santere ya Rwitsankuku n’uduce tuyikikije, bisenya ibikorwaremezo by’abasivile, abaturage bahatirwa guhunga ndetse bishyira ubuzima bw’abasivile b’inzirakarengane mu kaga gakomeye."

Col Kamasa yasobanuye ko ibi bitero byatumye abarwanyi ba Twirwaneho batabara byihuse, bahanura drone y’iri huriro, banafata ibice by’ingenzi birimo umusozi wa Baruta wari umaze igihe kinini wifashishwa n’uruhande bahanganye.

Ati "Mu gusubiza ibi bikorwa, abarwanyi ba MRDP-Twirwaneho bahise bajya kurwanirira abasivile, bahanura drone y’umwanzi yarasaga ibice bituwe n’abasivile, isubiza inyuma igitero cyo ku butaka, isenya ibirindiro by’umwanzi, ifata ibice by’ingenzi birimo umusozi wa Baruta wari umaze igihe kinini wifashishwa mu kurasa ibice bituwe n’abasivile.”

Twirwaneho yatangaje ko itazihanganira ubugizi bwa nabi bukorwa n’ihuriro ry’ingabo za Leta ya RDC kandi ko izakomeza kubahiriza inshingano yayo yo kurinda abasivile n’umutungo wabo.