Kuri uyu wa Gatatu, itariki 27 Ugushyingo 2024, u Bufaransa bwatangaje ko Minisitiri w’Intebe wa Israel, Benjamin Netanyahu, afite ubudahangarwa ku cyemezo cyo kumuta muri yombi cyatanzwe n’Urukiko Mpuzamahanga Mpanabyaha (ICC), ibyo bikaba bigaragaza impinduka mu myumvire yanenzwe n’imiryango iharanira uburenganzira bwa muntu.

Sponsored Ad

Urukiko ruruta izindi rw’ibyaha by’intambara ku Isi mu cyumweru gishize rwasohoye icyemezo cyo guta muri yombi Netanyahu, uwahoze ari minisitiri w’ingabo, Yoav Gallant, n’umuyobozi wa Hamas, Mohammed Deif, babashinja ibyaha byibasiye inyokomuntu n’ibyaha by’intambara mu gihe cy’amezi 13 Israel imaze mu ntambara muri Gaza.

Abayobozi b’Abafaransa bavuze ko bazakora "bakurikije sitati ya ICC" nubwo basubije ibisa nk’icyuka ku kumenya niba iki gihugu cyafata Netanyahu cyangwa Gallant baramutse basuye u Bufaransa.

Muri iki cyumweru, Minisitiri w’Intebe w’u Bufaransa, Michel Barnier, yabwiye inteko ishinga amategeko ko Paris "izubahiriza" inshingano zayo mu mategeko mpuzamahanga, byongera gushimangirwa na Minisitiri w’Ububanyi n’Amahanga w’u Bufaransa, Jean-No?l Barrot, mu kiganiro kuri televiziyo mu gitondo cyo kuwa Gatatu.

Icyakora, mu itangazo ryakurikiyeho ryashyizwe ahagaragara ku wa gatatu, minisiteri y’ububanyi n’amahanga y’u Bufaransa nk’uko iyi nkuru dukesha Euronews ivuga, hatangajwe ibitandukanye.

Minisiteri y’ububanyi n’amahanga yavuze ko Netanyahu n’abandi bavuzwe mu cyemezo cya ICC bungukirwa n’ubudahangarwa kuko Israel itari mu banyamuryango b’urukiko.

Minisiteri yavuze ko ibi "bizagenderwaho mu gihe ICC yaramuka idusabye kubata muri yombi no kubayishyikiriza".