U Buhinde bwohereje abapolisi 160 mu butumwa bw’amahoro bw’Umuryango w’Abibumbye muri Repubulika iharanira Demokarasi ya Congo.

Sponsored Ad

Aba bapolisi baba mu mutwe ushinzwe umutekano wo ku mupaka (BSF), boherejwe kuri uyu wa 4 Kamena 2025, nyuma y’umuhango wo kubasezera wabaye ku wa 2 Kamena uyobowe n’umuyobozi wawo, Daljit Singh Chawdhary.

Daljit yagaragaje ko yizeye ko aba bapolisi bazakora akazi kabo neza nk’uko BSF yarinze umupaka neza, cyane cyane mu bikorwa byiswe ‘Operation Sindoor’ byo guhangana n’Abanya-Pakstan byabaye kuva muri Mata kugeza muri Gicurasi 2025.

Ni cyiciro cya 18 cyoherejwe mu burasirazuba bwa RDC, kiyobowe na Kailash Singh Mehta. Umuvugizi wa BSF yasobanuye bazoherezwa mu mujyi wa Beni mu ntara ya Kivu y’Amajyaruguru.

Yagize ati “Bagiye gusimbura icyiciro cya 17 cya BSF gikorera muri Beni, kizataha tariki ya 4 Kamena.”

Mbere y’uko aba bapolisi boherezwa muri RDC, babanje guhabwa amahugurwa y’ibyumweru 11, arimo arebana n’amabwiriza ya MONUSCO, iby’ingenzi ku kazi bagiyemo, uburenganzira bw’ikiremwamuntu no kurinda abasivili bubashywe.

MONUSCO ifite ingabo zirenga ibihumbi 10, zaturutse mu bihugu birenga 50 n’abapolisi barenga 2000 baturutse mu bihugu birenga 20. Bakorera mu ntara ya Kivu y’Amajyaruguru na Ituri.