Sosiyete ya Apple yatangaje ko yashoye imari mu mushinga wo gutunganya ingufu zisubira ku Mugabane w’u Burayi, uzatanga ingufu zingana na megawatts 650.

Uyu mushinga uzibanda ku kubyaza amashanyarazi imirasire y’izuba n’umuyaga mu bihugu birimo u Bugereki, Latvia, Espagne, Pologne, Romania, n’u Butaliyani.

Ingufu zizaboneka binyuze muri uyu mushinga, zizifashishwa mu gusimbura izikoreshwa ubu mu gukora ibikoresho by’ikoranabuhanga bya Apple zangiza ikirere.

Imibare igaragaza ko mudasobwa za MacBook n’amasaha ya Apple, byiharira kimwe cya gatatu cy’imyuka yose ihumanya ikirere iva mu nganda za Apple.

Ingufu nyinshi zizashyirwa mu mushinga wo kubyaza amashanyarazi imirasire y’izuba mu bihugu by’u Bugereki, na Latvia mu gihe izindi zizashyirwa mu uwo kuyabyaza ingufu z’umuyaga muri Romania n’u Butaliyani.

Ku rundi ruhande 90% y’ibikorwa bya Apple mu Bushinwa byifashisha ingufu zisubira, iki kigo cyatangaje ko kigiye gushora miliyoni 150$ kugira ngo gifashe abakigezaho ibikoresho by’ibanze bikenerwa mu gukora ibikoresho muri iki gihugu kuyoboka izi ngufu.

Imirasire y’Izuba ndetse n’ingufu zikomoka ku muyaga, byahindutse isoko y’amashanyarazi ku bigo bikomeye by’ikoranabuhanga kubera ko bihendutse, ibikorwaremezo byabyo bikubakwa vuba, ndetse bigatanga ingufu igihe cyose. Ibigo nka Microsoft na Meta na byo birimo gushora akayabo mu mishinga imeze nk’uyu.