Guhera kuri uyu wa Gatanu, ibihugu 53 bya Afurika byakuriweho umusoro n’u Bushinwa ku bicuruzwa byabyo byohereza muri iki gihugu, ibintu byitezweho kuzamura isoko ryabyo.

Iyi gahunda yari yaratangiye gushyirwa mu bikorwa mu Ukuboza 2024, icyo gihe ibihugu 33 bisanzwe bifitanye umubano ukomeye n’u Bushinwa nibyo byayungukiyemo. Ubu yaguwe igera ku bihugu byose by’umugabane usibye Eswatini ifitanye umubano na Taiwan.

Gukuriraho imisoro ibihugu bya Afurika bizakomeza kugeza ku wa 30 Mata 2028.

Mu gihe u Bushinwa bwo bwakuriyeho ibihugu bya Afurika imisoro, Amerika yo iherutse gushyiriraho umusoro ugera hafi kuri 30% ku bihugu bya Afurika.

Gukuraho iyi misoro byitezweho kongera ubucuruzi bw’ibikomoka ku buhinzi bwoherezwa hanze n’ibihugu bya Afurika, bikazafasha mu kuzamura ubukungu bw’ibice by’icyaro, kongera umusaruro w’ubuhinzi no kugabanya inzara n’ubukene muri rusange.

Mu rukerera rwo ku wa Gatanu, toni 24 za pomme zivuye muri Afurika y’Epfo zanyuze mu igenzura rya gasutamo mu Mujyi wa Shenzhen mu Majyepfo y’u Bushinwa zitishyujwe umusoro, biba icyiciro cya mbere cy’ibicuruzwa bya Afurika byungukiye muri gahunda nshya yaguwe yo gukuraho imisoro.

U Bushinwa ni cyo gihugu gikorana ubucuruzi bwinshi na Afurika. Imibare igaragaza ko ubucuruzi hagati y’u Bushinwa na Afurika bwageze ku rwego rwo hejuru rutigeze rubaho, rungana na miliyari 348 z’amadolari ya Amerika mu 2025.

Muri ayo yose, ibyo u Bushinwa bwatumije muri Afurika byari bifite agaciro ka miliyari 123 z’amadolari, byiyongereyeho 5,4% ugereranyije n’umwaka wabanje.

U Rwanda ni kimwe mu bihugu bizungukira muri iyi gahunda kuko rwari rusanzwe rwohereza umusaruro ukomoka ku buhinzi mu Bushinwa. Ibyo rwoherezayo cyane birimo ikawa, icyayi n’ibireti. Rwoherezayo kandi avoka n’urusenda.