U Rwanda na Somalia byasinyanye amasezerano y’ubufatanye rusange, ibihugu byombi binemeranya gukomeza kuyashyira mu bikorwa vuba binyuze mu ishyirwaho rya Komisiyo Ihoraho y’Ubufatanye.

Ni amasezerano yasinyiwe i Kigali, ku wa 27 Ukwakira 2025, ashyirwaho umukono na Minisitiri w’Ububanyi n’Amahanga w’u Rwanda, Amb. Olivier Nduhungirehe na mugenzi we wa Somalia, Abdisalam Abdi Ali, wari mu ruzinduko rw’akazi mu Rwanda.

Mu biganiro byahuje aba baminisitiri b’Ububanyi n’Amahanga, bemeje ko umubano hagati y’u Rwanda na Somalia ushingiye ku bwubahane, intego zihuriweho, ndetse n’intumbero ikomeye y’ubumwe bwa Afurika.

Itangazo rihuriweho ryasohowe riti: “Bavuze ko uru ruzinduko ari intangiriro y’icyiciro gishya mu gushimangira umubano w’ibihugu byombi no gukomeza ubufatanye mu nzego zose zifitiye inyungu impande zombi.”

Minisitiri Nduhungirehe na mugenzi we Abdisalam Abdi Ali bashyizeho umukono ku masezerano rusange y’ubufatanye, banemeranya gukomeza kuyashyira mu bikorwa vuba binyuze mu ishyirwaho rya Komisiyo Ihoraho y’Ubufatanye, izakurikirana ishyirwa mu bikorwa ry’inzego z’ubufatanye zisanzweho, ndetse inatange ibitekerezo ku zindi nzego nshya z’ubufatanye, zirimo ubutabera, uburezi, ubuhinzi, ikoranabuhanga n’itumanaho n’ubufasha mu by’amategeko, n’izindi.

Banaganiriye ku bikorwa biri gukorwa bigamije kugarura amahoro mu burasirazuba bwa Repubulika Iharanira Demokarasi ya Congo, yaba ibiganiro by’i Doha ndetse na Washington D.C.

U Rwanda na Somalia byasinyanye amasezerano y’ubufatanye