U Rwanda rugiye kwakira inama ihuza abayobozi b’ibigo bitandukanye, abashoramari n’abanyapolitike baturutse muri Afurika ndetse no hirya no hino ku Isi. Ni inama izwi nka ‘Africa CEO Forum’.

Biteganyijwe ko iyi nama izitabirwa n’abarenga 2 800. Umuhango wo kuyitangiza uteganyijwe kuva ku wa 14 kugeza 15 Gicurasi 2026 muri Kigali Convention Center.

Uretse Perezida Kagame, Africa CEO Forum itegerejwemo Alassane Ouattara wa Côte d’Ivoire, Jeremy Awori, Umuyobozi Mukuru wa Ecobank, Jim Ovia Umuyobozi Mukuru ari na we watangije Zenith Bank n’abandi banyacyubahiro.

Africa CEO Forum ni inama izenguruka mu bihugu bya Afurika. U Rwanda rugiye kuyakira ku nshuro ya Gatatu kuko ku nshuro ya mbere rwayakiriye mu 2019, rwongera kuyakira mu 2024.

Itegurwa n’ikigo Jeune Afrique Media Group gifite ikinyamakuru Jeune Afrique, gifatanyije na Sosiyete y’Abasuwisi, Rainbow Unlimited izobereye mu gutegura inama zikomeye zijyanye n’ubukungu.

Ni inama mpuzamahanga ihuriza hamwe abavuga rikumvikana mu rwego rw’abikorera muri Afurika barimo abacuruzi bakomeye, abayobozi b’ibigo, abashoramari n’abandi.

Kugira ngo umuntu umwe yemererwe kwitabira iyo nama y’iminsi ibiri, agomba kuba yishyuye amayero 1950 (hafi miliyoni ebyiri z’amanyarwanda).

Kuba ufite ayo mafaranga gusa ariko ntibiguha uburenganzira bwo kwitabira, ahubwo ugomba kuba uri n’Umuyobozi Mukuru cyangwa wungirije w’ikigo runaka cy’ubucuruzi, umufatanyabikorwa, Minisitiri w’Ubukungu, Imari cyangwa Inganda, Umuyobozi Mukuru w’ikigo cy’imari cyangwa Umujyanama wa Perezida mu by’ubukungu.

Ikigo cy’Ubucuruzi nacyo cyemererwa kwitabira kigomba kuba nibura ku mwaka cyinjiza miliyoni icumi z’amayero (asaga miliyari 10 z’amanyarwanda).

Bamwe mu bakuru b’ibihugu n’abayobozi b’ibigo bikomeye bazitabira Africa CEO Forum iteganyijwe mu Rwanda mu kwezi kwa Gicurasi