Minisitiri w’Ububanyi n’Amahanga n’Ubutwererane, Amb. Olivier Nduhungirehe, yitabiriye inama ya Komite y’Abaminisitiri ishinzwe gukurikirana kandidatire z’Abanyafurika mu nzego mpuzamahanga, yabereye i Addis-Ababa muri Ethiopia, nyuma y’Inama ya 49 isanzwe ya Nyobozi y’Umuryango wa Afurika Yunze Ubumwe (AU).

Iyi nama yahuje abayobozi batandukanye baturutse mu bihugu bya Afurika, igamije guhuza no gushyigikira kandidatire z’Abanyafurika bahatanira imyanya mu miryango mpuzamahanga, hagamijwe kongera ijwi n’uruhare rwa Afurika ku rwego mpuzamahanga.

Mu ijambo yagejeje ku bitabiriye iyi nama, Minisitiri Nduhungirehe yagaragaje ibijyanye na kandidatire ya Madamu Louise Mushikiwabo ku mwanya w’Umunyamabanga Mukuru w’Umuryango w’Ibihugu bikoresha Igifaransa (OIF).

Yashimangiye ko u Rwanda rukomeje gushyigikira ubuyobozi bwe, ashimira uruhare rwe mu guteza imbere intego z’uyu muryango, zirimo guteza imbere ururimi rw’Igifaransa, ubufatanye mpuzamahanga n’iterambere rirambye.

Yakomeje avuga ko ubunararibonye bwa Mushikiwabo n’ubushobozi bwe mu miyoborere byagize uruhare rukomeye mu kongerera imbaraga ibikorwa bya OIF, bityo ko bikwiye ko akomeza gushyigikirwa kugira ngo akomeze kuyobora uyu muryango.

Iyi nama ije mu gihe ibihugu bya Afurika bikomeje gushyira imbaraga mu guteza imbere kandidatire z’ababihagarariye mu nzego mpuzamahanga, hagamijwe kongera uruhare rwabyo mu ifatwa ry’ibyemezo ku rwego rw’Isi.

Amatora y’Umunyamabanga Mukuru w’Umuryango w’Ibihugu bikoresha ururimi rw’Igifaransa (OIF) ya manda ya 2027-2030 ateganyijwe kuzaba hagati y’itariki ya 15 na 16 Ukuboza 2026 i Phnom Penh muri Cambodge. Louise Mushikiwabo uri ku buyobozi ni umwe mu bakandida bane bahatana kuri uyu mwanya.

Abakandida bane ni Louise Mushikiwabo, Umunyarwandakazi usanzwe ari Umunyamabanga Mukuru wa OIF; Juliana Amato Lumumba wo muri Repubulika Iharanira Demokarasi ya Congo; Coumba Ba wo muri Mauritanie na Dacian Cioloș wahoze ari Minisitiri w’Intebe wa Romania.