Guverinoma y’u Rwanda yagiranye n’iy’Ubwami bw’u Bwongereza na Panama amasezerano y’ubufatanye mu guteza imbere serivisi zo gutwara abantu n’ibintu mu kirere.

Aya masezerano yasinyiwe mu mujyi wa Punta Cana muri Repubulika y’Abadominikani, ahari kubera inama mpuzamahanga yiga ku iterambere rya serivisi z’ubwikorezi bwo mu kirere, ku wa 11 Ugushyingo 2025.

Aya mbere yashyizweho umukono na Ambasaderi w’u Rwanda muri Canada no muri Repubulika y’Abadominikani, Prosper Higiro, n’umuyobozi muri Guverinoma y’u Bwongereza ushinzwe ibiganiro muri serivisi z’ubwikorezi, Mark Bosly.

Aya kabiri yashyizweho umukono na Ambasaderi Higiro n’Umuyobozi Mukuru w’urwego rushinzwe indege za gisivili muri Panama, Marcos Castillo Masis.

Ikigo cy’u Rwanda gishinzwe indege za gisivili, RCAA, cyatangaje ko aya masezerano azafasha mu guharura inzira ihuza abaturuka mu bihugu byombi, afungure amahirwe y’ubucuruzi, ubukerarugendo n’ishoramari.

RCAA yagize iti: "Aya masezerano aharura inzira yo kongera ubufatanye mu by’indege, hafungurwa amahirwe mashya mu bucuruzi, ubukerarugendo n’ishoramari, hashyigikirwa ko ingendo z’indege zihenduka n’iterambere ry’ubukungu binyuze mu ihatana ryisumbuyeho mu by’ingendo.”

Aya masezerano azwi nka BASA (Bilateral Air Services Agreement) aha sosiyete z’indege uburenganzira bwo kuvana abagenzi n’izindi serivisi mu gihugu kimwe, zibajyana mu kindi.

Hashingiwe kuri aya masezerano, ibihugu byemeranya ku bibuga indege zigwaho, inshuro zibigwaho, umubare ntarengwa w’abagenzi cyangwa imizigo, ibiciro bya serivisi no ku mahame agenga umutekano wa serivisi.

Ambasaderi Prosper Higiro na Mark Bosly basinyiye aya masezerano mu mujyi wa Punta Cana