Mu gihe cy’iminsi itatu, u Rwanda rwakiriye abarwanyi 33 bahoze barwana mu mitwe yitwaje intwaro ikorera muri Repubulika Iharanira Demokarasi ya Congo, irimo umutwe w’iterabwoba wa FDLR, Nyatura na Wazalendo.

Ni amakuru yatangajwe na Gatabazi Jean Marie Vianney, Komiseri muri Komisiyo y’Igihugu yo Gusezerera no Gusubiza mu Buzima busanzwe abahoze mu Ngabo, mu butumwa yanyujije ku rubuga rwa X.

Gatabazi yanditse ko mu minsi itatu, hagati ya tariki 20 na 23 Mutarama 2023, muri Komisiyo y’Igihugu yo Gusezerera no Gusubiza mu Buzima busanzwe abahoze mu Ngabo, bakiriye abahoze ari abarwanyi 33 bo mu mitwe ya FDLR, Nyatura na Wazalendo bavuye muri Repubulika Iharanira Demokarasi ya Congo.

Ati: "Bagiye gusanga bagenzi babo muri gahunda yo gusubizwa mu buzima busanzwe mbere yo gusubizwa mu miryango yabo."

Mu bakiriwe barimo abasirikare umunani bahoze mu mutwe w’Ingabo z’idasanzwe muri FDLR uzwi nka CRAP bayoborwaga na Lt Col Guillaume nk’uko byatangajwe na Komiseri Gatabazi Jean Marie Vianney.

Iyo abahoze ari abarwanyi batashye, bahita bajyanwa i Mutobo kugira ngo bahabwe amahugurwa agamije kubakuramo ingengabitekerezo mbi ya Jenoside bigishwa mu mashyamba ya Repubulika iharanira Demukarasi ya Congo, nyuma bagasubizwa mu buzima busanzwe.

Imibare itangwa na Komisiyo y’igihugu ishinzwe gusezerera no gusubiza mu buzima busanzwe abahoze ari abasirikare (RDRC) igaragaza ko kuva mu 2001 imaze gusubiza mu buzima busanzwe abantu 12, 602 bahoze mu mitwe y’inyeshyamba ikorera mu burasirazuba bwa Repubulika Iharanira Demokarasi ya Congo, bose baje mu byiciro 75 bimaze kuhanyuzwa.

Abahoze mu mitwe yitwaje intwaro muri Congo bakiriwe mu Rwanda