Minisitiri w’Ububanyi n’Amahanga n’Ubutwererane w’u Rwanda, Olivier Nduhungirehe, yashyize umukono ku masezerano y’Umuryango wa Afurika Yunze Ubumwe agamije kurwanya no guca ihohoterwa rikorerwa abagore n’abakobwa (AU-CEVAWG).

Iki gikorwa cyabereye i Addis Ababa muri Ethiopia, cyatumye u Rwanda ruba igihugu cya cyenda gishyize umukono kuri ayo masezerano, agaragaza ubushake bwo gukomeza guhangana n’ihohoterwa rishingiye ku gitsina ku mugabane wa Afurika.

Aya masezerano ya AU ashyiraho urwego rw’amategeko ruhuriweho ku rwego rw’umugabane wa Afurika rugamije gukumira, kurinda no guhangana n’ubwoko bwose bw’ihohoterwa rikorerwa abagore n’abakobwa. Harimo ingamba zo gukaza amategeko, gufasha abahohotewe, no gushyiraho uburyo buhamye bwo gukurikirana no guhana abakoze ihohoterwa.

U Rwanda rwagaragaje ko rushyigikiye aya masezerano kuko ajyanye n’icyerekezo cyarwo cyo kubaka Igihugu gishyira imbere uburinganire n’ubwuzuzanye bw’abagabo n’abagore, ndetse n’amahame akubiye muri Politiki y’Igihugu y’Uburinganire.

Iki gikorwa kije cyiyongera ku zindi ngamba u Rwanda rusanzwe rufite zigamije kurengera uburenganzira bw’abagore n’abakobwa, no kubaka sosiyete itekanye kandi idaheza.