Minisitiri w’Ubuzima Dr. Sabin Nsanzimana yaburiye abantu badakora imyotozo ngororamubiri ko ikiguzi cyabyo bazacyishyura binyuze mu kwishyura amafaranga n’ubuzima bwabo, mu gihe abazikora bazigama arenga miliyoni 3,6 Frw bari kujyana kwivuza.

Ibi yabitangaje ku wa 9 Ugushyingo 2025, abinyujije ku rubuga rwa X.

Dr Nsanzimana yagaragaje ko ubushakashatsi bwerekanye ko umuntu ashobora kuzigama agera ku 2.500$ (3.627.215 Frw) yari kuzakoresha yivuza aramutse akora siporo zihagije.

Ati: “Wanga gukora imyitozo ngororamubiri ukabyishyura inshuro ebyiri ukoresheje amafaranga n’ubuzima bwawe. Gukora iyi myitozo bituma uzigama 2.500$ ku mafaranga yo kwivuza, bikagabanya 30% y’iminsi yo kurwara ndetse bikongera umusaruro n’imikorere y’ubwonko.”

Ubushakashatsi bwagaragaje ko 30% y’abatuye Isi nta myitoza ngororamubiri bakora, bikaba intandaro y’impfu zigera kuri miliyoni eshanu ziba buri mwaka kuko kudakora siporo bifite aho bihurira n’indwara nyinshi zirimo n’izo mu mutwe.

Itsinda ry’abashakashatsi bo mu Burayi, RAND Europe, rikora ubushakashatsi ku ngaruka zo kudakora siporo ku bukungu, bugaragaza ko abantu bitabiriye gukora siporo umusaruro mbumbe w’Isi wakwiyongera.

Ubu bushakashatsi bwagaragaje ko abantu bakoze siporo neza mu mwaka wa 2050 umusaruro mbumbe w’Isi (global GDP) wakwiyongeraho ari hagati ya miliyari 314$ na 760$, kuko byaba byagabanyije iminsi abantu bajya gukora ariko ntibatange umusaruro kuko batameze neza ku kigero cya 30%.

Si ibyo gusa byakongera umusaruro ku kigero cya 15%, bikongera imitekerereza myiza, ndetse bikagabanya amafaranga yakoreshwaga mu kwivuza.

Ubu bushakashatsi bugaragaza ko ibyo byagerwaho ari uko abakoresha bashishikarije abakozi babo gukora siporo, gushyiraho ibikorwa bikangurira abantu gukora siporo n’ibindi.

Mu Rwanda mu rwego rwo guteza imbere umuco wo gukora siporo bifatanyijwe no kugabanya imyuka ihumanya ikirere, Umujyi wa Kigali washyizeho umunsi wa siporo rusange uzwi nka ‘Car free day’ uba buri cyumweru cya mbere n’icya gatatu cy’u kwezi.

Kuri uwo munsi abaturage bahurira muri imwe mu mihanda iba yateganyijwe bagakora siporo ndetse bagapimwa indwara zitandukanye kugira ngo bamenye uko bahagaze.

Buri wa Gatanu kandi abakozi bataha saa Cyenda bakajya mu myitozo ngororamubiri hagamijwe kubungabunga ubuzima bwabo.