Ubutasi bwa Kenya bwahishuye ko abaturage 1,000 b’iki gihugu ari bo bari kurwana intambara y’u Burusiya na Ukraine.

Bikubiye muri raporo Urwego rushinzwe ubutasi bwa Kenya (NIS) rwagejeje ku nteko ishinga amategeko ya kiriya gihugu.

Iyo raporo ivuga ko abenshi mu banya-Kenya bisanze muri iriya ntambara, nyuma yo gushukwa bakisanga basinye amasezerano ya gisirikare.

Amaperereza atandukanye arimo n’iriheruka gukorwa n’Ibiro Ntaramakuru AFP by’Abafaransa, yerekana ko u Burusiya bwagiye bwifashisha mu ntambara burwanamo na Ukraine Abanyafurika, nyuma yo kubizeza akazi keza.

Iperereza rihuriweho ryakozwe n’ubutasi bwa Kenya ndetse n’urwego rushinzwe iperereza ku byaha rwa kiriya gihugu, ryerekana ko abanya-Kenya barenga 1,000 ari bo binjijwe muri iriya ntambara, mu gihe inzego z’ubuyobozi bw’iki gihugu zo zavugaga ko abayinjijwemo babarirwa muri 200.

Umukuru w’abafite ubwiganze mu nteko ishinga amategeko ya Kenya, Kimani Ichung’wah, yagaragaje ko “abanya-Kenya bava mu gihugu bagendeye kuri viza za ba mukerarugendo, bakinjira mu gisirikare cy’u Burusiya banyuze Instanbul muri Türkiye cyo kimwe n’i Abu Dhabi muri Leta Zunze Ubumwe z’Abarabu.”

Yunzemo ko kubera gukaza ingamba z’umutekano ku kibuga cy’indege cya Nairobi, biba ngombwa ko abajya mu gisirikare cy’u Burusiya baca mu bindi bihugu bya Afurika mu kwirinda ko babonwa.

Kenya kuri ubu ivuga ko mu baturage bayo bagiye kurwana muri Ukraine, 39 barwariye mu bitaro, 28 bakaba baraburiwe irengero, mu gihe 89 bakiri ku rugamba.

Kuri ubu Minisitiri w’Ububanyi n’Amahanga wa Kenya, Musalia Mudavadi, arateganya gusura u Burusiya mu kwezi gushize mu rwego rwo kuganira n’ubuyobozi bw’iki gihugu ku ikoreshwa ry’abanya-Kenya mu ntambara kirwanamo na Ukraine.