Minisitiri w’Ubumwe bw’Abanyarwanda n’Inshingano Mboneragihugu Dr Bizimana Jean Damascène yibukije urubyiruko ko rudakwiye kujya rufata ubutwari nk’amateka gusa, ahubwo bakwiye kubufata nk’indangagaciro z’Umunyarwanda muzima.

Yabikomojeho mu gitaramo cyo kwizihiza no gusingiza Intwari z’Igihugu mu ijoro rishyira kuri iki Cyumweru tariki ya 1 Gashyantare 2026, ahizihizwa Umunsi w’Intwari, kikaba cyarateguwe n’Umujyi wa Kigali ufatanyije n’abafatanyabikorwa bayo.
Mu ijambo rye, Minisitiri Dr Bizimana Jean Damascène yabwiye abasusurukijwe n’icyo gitaramo imbonankubone cyangwa banyuze ku ikoranabuhanga ko insanganyamatsiko y’uyu mwaka itari yo kumva gusa bakabisiga aho.
Yagize ati: “Uyu mwaka turizihiza Umunsi w’Intwari zacu ku nshuro ya 32, ku nsanganyamatsiko igira iti: ‘Ubutwari n’Ubumwe bw’Abanyarwanda, inkingi z’Iterambere’. Iyi nsanganyamatsiko si amagambo gusa, ni ishingiro ry’amateka yacu, ni ishingiro ry’aho tuva, aho tugeze n’aho tugana.”
Yakomeje agira ati: “Ubutwari si amateka yo gusoma mu bitabo gusa, ni umurage dukomora ku bakurambere bacu baranzwe n’ubutwari kuva u Rwanda rwahangwa kugeza ubu. Abanyarwanda tugomba guha icyubahiro Intwari zahanze u Rwanda.”
Akomeza agaragaza ko mbere byagoranaga kuba Intwari, icyakora kuri ubu ngo hari byinshi bagomba gushingiraho ndetse bakabibungabunga.
Ati: “Muri iki gihe kandi, duha icyubahiro Intwari zikomeje kurwana urugamba rutoroshye rwo kongera kubaka u Rwanda rushya rushingiye ku bumwe, amahoro, iterambere n’imibereho myiza.”
Yakomeje ahamya ko Abanyarwanda bakwiye kwitarwararika bakirinda kwishora mu ngeso mbi kuko inshingano yo kubungabunga amateka y’Igihugu iri mu biganza byabo.
Ni igitaramo cyari cyitabiriwe ku rwego rwo hejuru, kinasusurutswa n’abarimo Jazz Band, Bwiza, Urukerereza, Uragangazi hamwe na Kitoko wageze ku rubyiniro ibitu bigahindura isura.
Kitoko yagize ati: “U Rwanda ni urwacu twese. Ejo hazaza h’u Rwanda hari mu maboko yacu twese. Duharanire kuba intwari z’ukuri: intwari zubaka, intwari zihuza Abanyarwanda, intwari zihesha Igihugu cyacu ishema.”
Iki gitaramo cyari gifunguriwe buri wese aho kwinjira byari ubuntu, bigatuma abantu barushaho kuba benshi cyane mu mahema ya Camp Kigali aho cyabereye.

Urukerereza mu basusurukije abitabiriye igitaramo

Itsinda rya Jazz Band riri mu basusurukije igitaramo