Minisiteri y’Ubuzima ya Uganda yatangaje ko muri iki gihugu habonetse abandi barwayi babiri ba Ebola, muri rusange ababonetse bakaba bageze kuri barindwi.

Itangazo ryasohotse kuri uyu wa 25 Gicurasi 2026 rivuga ko babiri babonetse ari Abanya-Uganda bakorera mu ivuriro ryigenga riri mu Mujyi wa Kampala. Bajyanywe mu kigo cyihariye kiri kuvurirwamo abanduye iki cyorezo.

Iyi Minisiteri yasobanuye ko hari gukorwa urutonde rw’abahuye n’aba bantu kugira ngo bakurikiranirwe hafi, kuko bikekwa ko bamwe muri bo bashobora kuba barandujwe iki cyorezo.

Ebola yinjijwe muri Uganda n’umuntu waturutse muri Repubulika Iharanira Demokarasi ya Congo, agiye kwivuriza i Kampala. Uyu Munye-Congo yapfiriye mu bitaro bya Kibuli Muslim Hospital.

Umurwayi wa kabiri wanduye Ebola wagaragaye i Kampala na we ni Umunye-Congo. Yitaweho n’abaganga, akira ibimenyetso by’iki cyorezo. Minisiteri y’Ubuzima yasobanuye ko ari hafi gusezererwa n’ibitaro.

Tariki ya 23 Gicurasi, iyi Minisiteri yatangaje ko habonetse abandi barwayi ba Ebola batatu barimo umushoferi w’Umunya-Uganda watwaye uwishwe n’iki cyorezo, umuganga wamuvuye ndetse n’undi Munye-Congo.

Minisiteri y’Ubuzima ya Uganda yasabye abaturage bafite ibimenyetso by’iki cyorezo birimo kuribwa mu nda, kuruka, umuriro mwinshi no kuva amaraso ko bajya ku mavuriro kugira ngo bakurikiranwe.

Abanya-Uganda bamenyeshejwe ko kwivuza kare byongera amahirwe yo kuticwa n’iki cyorezo.

Muri RDC, kugeza tariki ya 23 Gicurasi hari hamaze kuboneka abantu 904 bikekwa ko banduye Ebola, barimo 101 byemejwe ko banduye. Hari abantu 220 bikekwa ko bishwe na cyo.