Minisitiri w’Umutekano w’Imbere mu gihugu muri Uganda, Kahinda Otafiire, yasabye Abapasiteri bakomeye muri iki gihugu basigaye barindwa n’abapolisi, kubireka, bakajya barindwa n’Imana.

Ibi Otafiire yabigarutseho mu minsi ishize mu kiganiro yagejeje kuri Komisiyo ishinzwe ibijyanye n’umutekano mu Nteko Ishinga Amategeko ya Uganda.

Ni ibiganiro byari bigamije kurebera hamwe ingengo y’imari ya 2026/27 izakoreshwa mu bijyanye n’umutekano w’imbere mu gihugu muri Uganda. Ni nyuma y’uko bigaragaye ko ikiguzi gisigaye kigenda muri uru rwego kiri hejuru.

Otafiire yagaragaje ko muri Uganda hamaze iminsi hari ikibazo cy’abapasiteri bakomeye, basaba uburinzi bwa polisi y’igihugu, bikongera amafaranga uru rwego rukoresha.

Ikibazo cy’abapasiteri barindwa n’abapolisi cyagaragajwe bwa mbere na Depite Wilson Kagyengwe, wagaragaje ko atumva impamvu bikorwa, kandi nta mpungenge ziba zihari ku mutekano wabo.

Ati “Ese koko aba bapasiteri bakwiriye abarinzi? Kuki pasiteri akeneye umurinzi, hari impungenge ku buzima bwe? Niba ari byo yaba aziterwa na nde?”

Minisitiri Otafiire yasabye aba bapasiteri kubireka, ahubwo bakiringira ko Imana bakorera izabarinda.

Ati “aba bakozi b’Imana bagomba kurindwa n’Imana. Bakorera Imana, izo ni inshingano z’Imana, nubwo badusaba kubishyura, Imana ubundi ni yo ikwiriye kubishyura.”