Polisi yo mu Mujyi wa Lira muri Uganda, yatangaje ko yataye muri yombi umugabo ushinjwa gusebya Perezida Yoweri Kaguta Museveni, mu mashusho yakwirakwiye cyane ku mbuga nkoranyambaga.

Byatangajwe ko uyu mugabo witwa Okuja Fred, utuye mu gace ka Anai Oki, mu mujyi wa Lira, yafashwe tariki 1 Ukwakira 2025.

Amakuru yatanzwe n’inzego z’umutekano avuga ko Okuja Fred yifashe amashusho maze akayashyira ku rubuga rwa TikTok, avuga amagambo adaha agaciro umukuru w’igihugu.

Uyu mugabo mu mashusho yafashe yagize ati “Ukwiye kumenya ko utatwica twese. Gaddafi yarabigerageje ariko ntiyabishoboye. Nutekereza kuzana intambara, ntituzatinya.”

Umuvugizi wa Polisi mu Ntara ya Kyoga, SP Patrick Jimmy Okema, yatangaje ko uyu mugabo afungiye kuri Sitasiyo ya Polisi ya Lira City Central mu gihe iperereza rigikomeje.

Okema yakomeje aburira abaturage kwirinda gukoresha nabi imbuga nkoranyambaga, bakwirakwiza amagambo y’urwango n’ibindi bishobora guteza imvururu, yibutsa ko ibyo ari ibyaha bihanishwa amategeko.

Yongeyeho ko inzego z’umutekano zizakomeza gukurikirana imikoreshereze y’imbuga nkoranyambaga, kandi ko uzafatwa agerageza kurenga ku mategeko ko azabihanirwa.