Charlene Ruto, umukobwa wa Perezida wa Kenya, William Ruto, yasuye Umugaba Mukuru w’Ingabo za Uganda (UPDF), Gen. Muhoozi Kainerugaba. Bahuye kuri uyu wa 25 Gashyantare 2026, ku cyicaro gikuru cy’ingabo zidasanzwe (SFC) i Entebbe.

Uru ruzinduko ruje rukurikira itangazo riherutse gutangazwa na Gen Kainerugaba ku rukuta rwe rwa X, aho yatangaje ko yifuza gusura Perezida wa Kenya, William Ruto, mu minsi ya vuba, bikaba byerekana ko hakomeje kubaho kwiyemeza guteza imbere umubano wa hagati y’ibihugu byombi by’ibituranyi.

Intumwa ziyobowe n’umukobwa wa Ruto zirimo George Nkya, Umujyanama w’icyubahiro wa Maroc; Festus Orina, Varsheeni Ragupathy, na Hon. Jane Frances Acilo.

Mu nama yagiranye n’umukobwa wa Perezida Ruto, Gen Kainerugaba yakiriye neza abashyitsi be mu gihe umukobwa wa Ruto yashimiye Jenerali kuba yamwakiriye neza n’intumwa ayoboye.

Abafatanyabikorwa bombi bo muri Afurika y’Iburasirazuba basangiye ibirenze umupaka, aho abaturage benshi bavuga indimi zimwe kandi bagasangira imico gakondo hamwe n’indangagaciro za basekuruza, bigatuma habaho ubumwe budasanzwe hagati y’ibihugu byombi.

Usibye iyo mibanire n’umuco, ubufatanye mu bya diplomasi n’ubukungu hagati ya Nairobi na Kampala bukomeje gukomera.

Ubucuruzi hagati y’ibihugu byombi ni umusingi w’ubukungu bw’akarere, aho ubucuruzi bw’ibihugu byombi bwageze kuri miliyari 1.5 USD mu 2025.