Icyogajuru cya NASA cyitwa Juno cyagaragaje ko Umubumbe wa Jupiter ari muto kandi ko urambaraye gato ugereranyije n’ibyari bisanzwe bizwi.

Icyogajuru cya Juno cyagenewe kwiga kuri Jupiter. Cyoherejwe mu isanzure ku itariki ya 5 Kanama 2011, kigera kuri uwo mubumbe ku ya 4 Nyakanga 2016.

Intego nyamukuru ni ugukusanya amakuru ahagije ku bijyanye n’ikirere cy’uyu mubumbe, imbaraga rukuruzi zawo, ndetse n’imiterere yawo y’imbere.

Juno igamije gufasha abahanga mu bya siyansi gusobanukirwa inkomoko ya Jupiter, bikanabafasha kumva uko isanzure ryacu rya ‘système solaire’ ryiremye.

Amakuru yasohotse muri Nature Astronomy, agaragaza avugururye ku yari yarabonetse mu myaka ya 1970 yagaragajwe n’ibyogajuru bya Voyager na Pioneer.

Ibipimo bishya bigaragaza ko umurambararo wa Jupiter upimiye kuri koma yayo, ari ibilometero 142.976. Iyi mibare yagabanyutseho ibilometero umunani ugereranyije n’ibyari bihari mbere.

Umurambararo wayo upimiye ku dusongero ungana n’ibilometero 133.684. Iyi mibare yagabanyutseho ibilometero 24 ugereranyije n’ibyari bizwi.

Ibi bivuze ko koma ya Jupiter ari ngari ku rugero rwa 7% ugereranyije n’udusongero twayo.

Umushakashatsi ukuriye ubu butumwa, Eli Galanti yagaragaje ko ibi bipimo ari ingenzi cyane mu kubona ishusho y’imiterere y’imbere y’uyu mubumbe ukungahaye ku myuka ya hydrogen na helium.

Jupiter ni umubumbe munini cyane muri système solaire ufite ubuso bwikubye inshuro 1.300 ubw’Isi. Byizerwa ko wagize uruhare rukomeye mu iremwa ry’indi mibumbe iwukikije.