Urukiko rw’Ibanze rwa Mukamira rwarekuye by’agateganyo ndetse na burundu abayobozi umunani barimo Umunyamabanga Nshingwabikorwa w’Akarere ka Nyabihu, bakekwaho kunyereza umutungo ufitiye rubanda akamaro, abandi umunani barimo abahagarariye IBUKA n’umukozi ushinzwe imyubakire bahabwa gufungwa iminsi 30 y’agateganyo.

Uru rubanza ruregwamo abarimo Umunyamabanga Nshingwabikorwa w’Akarere ka Nyabihu, David Mugiraneza, Umuyobozi w’ishami ry’imibereho myiza, rwatangiye kuburanishwa ku wa Kabiri, tariki 28 Ukwakira 2025, ku Rukiko rw’Ibanze rwa Mukamira.

Amakuru agera kuri UMURYANGO ni uko umwanzuro ku ifunga n’ifungurwa ry’agatenyo wasomwe ku mugoroba wo ku wa Kane, tariki 30 Ukwakira 2025, ndetse urukiko rutegeka ko bamwe bahita barekurwa bagasubira mu nshingano, mu gihe abandi bakomeje gufungwa.

Abakomeje gufungwa barimo Perezida wa IBUKA muri aka karere n’abandi bayobozi bo muri uyu muryango bo mu mirenge ya Bigogwe, Mukamira, Muringa, Rugera, Kintobo na Rambura, yagombaga kubakwamo inzu 17 z’abarokotse Jenoside yakorewe Abatutsi.

Urukiko rwategetse ko Habarurema Silas na Muhizi Alphonse bashinzwe amasoko, Mutwarangabo Simon umuyobozi w’ishami ry’imibereho myiza, Nzafashwanayo Jean Claude ushinzwe gukurikirana imyubakire y’amashuri, Uwizeye Gustave usanzwe ashinzwe ubutaka mu murenge wa Jenda bahita barekurwa bagasubira mu nshingano.

Urukiko rwategetse ko Umunyamabanga Nshingwabikorwa w’Akarere ka Nyabihu, David Mugiraneza n’umukozi mu ishami ry’imibereho myiza, Gahamanyi Sylvestre bafungurwa, ingwate batanze zigafatirwa kugeza baburanye mu mizi.

Urukiko kandi rwategetse ko Umukozi ushinzwe gutanga impushya zo kubaka, Nsengiyumva Denis n’abari bahagarariye IBUKA bose muri iki gikorwa cyo kubaka inzu z’abarokotse Jenoside yakorewe Abatutsi gufungwa iminsi 30 y’agateganyo.

Abagizwe abere ndetse urukiko rugahita rutegeka ko barekurwa, byaturutse ku kuba rwarasuzumye rusanga ntaho bari bahuriye n’iyubakwa ry’inzu 17, kubera ko harimo abo mu masoko kandi nta soko ryigeze ritangwa.

Abo rwategetse ko bataha ariko bagakomeza kwitaba, rwasuzumye ibyo baregwa rusanga nta mpamvu zikomeye zatuma batoroka ubutabera, kandi ingwate batanze zafatiriwe.

Ni mu gihe abakomeje gufungwa ari bo bakurikiranaga bya hafi iyubakwa ry’izi nzu 17.