Umunyamabanga Mukuru w’Umuryango w’Abibumbye, Antonio Guterres, yagize Umunyamerika James Swan Umuyobozi w’ubutumwa bw’amahoro bwawo muri Repubulika Iharanira Demokarasi ya Congo (MONUSCO).

Swan amaze imyaka myinshi akorera muri Afurika. Kuva mu 2001 kugeza mu 2004 yabaye Ambasaderi wungirije wa Amerika muri RDC, kuva mu 2008 kugeza mu 2011 aba Ambasaderi muri Djibouti, kuva mu 2011 kugeza mu 2013 aba intumwa yihariye ya Loni muri Somalia, kuva mu 2013 kugeza mu 2016 aba Ambasaderi muri RDC.

Kuva mu 2019 kugeza mu 2022, Swan yari intumwa yihariye y’Umunyamabanga Mukuru wa Loni, akaba n’umuyobozi w’ubwahoze ari ubutumwa bw’amahoro bw’uyu muryango muri Somalia (UNSOM).

Kuva muri Werurwe 2025, Swan yari intumwa yihariye y’Umunyamabanga Mukuru wa Loni muri Somalia akaba n’umuyobozi w’ubutumwa bw’amahoro bw’inzibacyuho bw’uyu muryango muri iki gihugu (UNTMIS).

Uyu Munyamerika agiye gusimbura Bintou Keita wakomokaga muri Guinée-Conakry, wavuye ku buyobozi bwa MONUSCO tariki ya 30 Ugushyingo 2025 habura igihe gito ngo manda ye irangire.

Mu gihe Bintou yari yaravuye kuri uyu mwanya, yasimbuwe by’agateganyo n’Umuholandikazi Vivian van de Perre wari umwungirije, ubwo hari hategerejwe umuyobozi mushya wa MONUSCO.

MONUSCO igiye kuyoborwa n’Umunyamerika mu gihe Amerika ikomeje gushyira imbaraga mu kugarura amahoro mu karere no muri RDC, by’umwihariko, hashingiwe ku masezerano y’amahoro ya Washington n’ibiganiro bya Doha.

Muri iki gihe kandi, MONUSCO yahawe inshingano yihariye yo kugenzura iyubahirizwa ry’agahenge muri teritwari ya Uvira, intara ya Kivu y’Amajyepfo, nyuma y’aho AFC/M23 ikuye abarwanyi mu mujyi waho, gusa ibi bikorwa ntibiratangira.

Amerika yagiranye na RDC amasezerano y’ubufatanye mu nzego z’ubukungu zirimo ubucukuzi bw’amabuye y’agaciro, Leta ya RDC na yo iyisaba kuyifasha kubaka inzego zayo z’umutekano, cyane cyane igisirikare.

Impande zombi zikomeje ibiganiro kugira ngo ubu bufatanye buzashoboke. Kuva muri Mutarama 2026, amatsinda y’abasirikare b’Abanyamerika yagiriye i Kinshasa inzinduko zigamije kunoza iyi gahunda.

James Swan yari asanzwe ari Umuyobozi wa UNTMIS muri Somalia