Ingabo z’Umuryango w’abibumbye ziri muri Congo Kinshasa mu butumwa bwo kugarura amahoro mu burasirazuba bw’icyo gihugu, MONUSCO zavuze ko Intumwa idasanzwe y’Umunyamabanga wa UN muri Congo, Bintou Keita azasura Goma.

Sponsored Ad

Uruzinduko rwe rwitezwe kuri uyu wa Kane tariki 12 Kamena 2025 akaba azagera i Goma anagirane ibiganiro n’abayobozi b’ihuriro Alliance Fleuve Congo rifatanya na M23.

Amezi arenga atanu arirenze inyeshyamba za M23/AFC zifashe umujyi wa Goma warimo icyicaro cya MONUSCO, ni cyo gihe Bintou Keita aheruka muri uwo mujyi.

Bintou Keita yakunze kumvikana ashinja M23/AFC guhonyora uburenganzira bwa muntu no kubangamira ibikorwa by’ubutabazi.

Uru ruzinduko rwe mu gace kagenzurwa na M23/AFC ngo rugamije kubaza amakuru ku mpinduka zagezweho n’ingaruka intambara yagize ku baturage b’abasivile kugira ngo azabone ibyo ashyikiriza Akanama ka UN gashinzwe amahoro n’umutekano mu nama izaba tariki 27 Kamena, 2025.

Abasesengura babona uru ruzinduko rwa Madamu Bintou Keita mu gace kagenzurwa na M23/AFC ari ikimenyetso ko izi nyeshyamba zifite umwanya ufatika mu byatuma Congo yongera kubona amahoro.

MONUSCO yahisemo gufatanya n’ingabo za Congo mu bikorwa byo kurwanya M23/AFC haba mu kuziha imyitozo no kuzuha amakuru y’urugamba, ibikorwa M23 yagiye yamagana ndetse igafata MONUSCO nk’umwe mu bayirwanya.

Kugeza ubu umujyi wa Goma no mu bindi bice bigenzurwa na M23/AFC bisa n’ibitekanye ndetse hari abemeza ko umutekano uharangwa uruta uwahahoze hagenzurwa n’ingabo za Leta ya Congo, FLDC n’imitwe myinshi ikorana na zo irimo Wazalendo na FDLR.

Uyu mujyi wa Goma ni wo ubu ubarizwamo Joseph Kabila wahoze ayobora Congo Kinshasa, na bamwe mu banyepolitiki bakoranye na we.

Ihuriro AFC/M23 ubwo ryafataga uyu mujyi muri Mutarama 2025, ryahise rishyiraho Guverineri mushya w’Intara ya Kivu ya Ruguru, rinashyiraho abayobozi bandi barimo n’uyobora umujyi wa Goma.