Ikigo cy’Igihugu gishinzwe amazi, isuku n’isukura (WASAC Group), cyashyikirijwe imashini 10 zipima ubuziranenge bwa Mubazi zifite agaciro k’arenga 14,000,000 Frw n’Umuryango Water for People.

Izi mashini WASAC Group yahawe zizifashishwa na ba Rwiyemezamirimo bafasha mu kugeza amazi meza mu bice by’icyaro gupima ubuziranenge bwa Mubazi z’Abafatabuguzi b’amazi mu bice bakoreramo.
Kugira ngo umenye ko Mubazi y’umufatabuguzi w’amazi ari nzima, ni uko imashini ipima ubuziranenge yatanzwe na Water for People igomba kubara Litiro 20 na Mubazi y’Umufatabuguzi ikabara Litiro 20 zuzuye cyangwa 19 cyangwa se 21.
Mu gihe Mubazi y’Umukiriya wa WASAC Group yaba igaragaje litiro ziri hejuru ya 21 bivuze yapfuye kuko iba ibarira amazi menshi umufatabuzi w’amazi mu gihe Mubazi yaba igiye munsi ya Litiro 19 nabyo bigaragaza ko yapfuye kuko umuturage aba yishyura amazi macye ugereranije n’ayo yakoresheje. Iyo Mubazi y’Umufatabuguzi w’amazi bigaragaye ko yapfuye ihita isimbuzwa.
Ibi byagarutsweho kuri uyu wa Gatatu tariki 11 Gashyantare 2026, mu muhango wabereye ku cyicaro cy’Umuryango Water for People mu Mujyi wa Kigali, ubwo WASAC Group yashyikirizwaga imashini zipima ubuziranenge bwa Mubazi zikoreshwa n’abafatabuguzi b’amazi.
Bimenyimana Robert, Umuvugizi w’Ikigo Gishinzwe Amazi, Isuku n’Isukura yabwiye Imvaho Nshya ko inkunga yatanzwe na Water for People ari ingenzi kuko nubwo WASAC Group isanzwe ifite imashini zigenzura ubuziranenge bwa Mubazi, zidahagije.
Yagize ati: “Mu bice by’icyaro ahakorera ba Rwiyemezamirimo badufasha kugeza amazi meza ku baturage, imashini zipima ubuziranenge bwa Mubazi, ntizari zihagije. Turashimira Water for People kuri iyi inkunga y’ingenzi iduhaye kuko izafasha kumenya ubuziranenge bwa Mubazi abafatabugizi b’amazi bakoresha.”
Avuga ko kandi gupima ubuziranenge bwa Mubazi bibafasha no kugabanya amazi ameneka atageze ku bo agomba kugeraho.
Ati: “Iyo Mubazi ikora nabi, ishobora kukwereka ko amazi yakoreshejwe ari ku kigero runaka kiri hasi y’ikigero cy’amazi yaciyemo.
Icyo gihe rero wa muntu uje kureba amazi yakoreshejwe mu rugo, araza agasoma ibyanditseho wenda ntanamenye ko Mubazi yapfuye, ugasanga afashe imibare mikeya kandi amazi yo yakoreshejwe ari menshi.
Ibi rero bihita biba igihombo kuri twe, kandi amazi asaba ikiguzi kitari gito mu kuyasukura no kuyageza ku bafatabugzi bacu.
Iyo haje uburyo nk’ubu bwo gupima ubuziranenge bwa Mubazi, bidufasha ko amazi yose yatunganyijwe abasha kugera ku bo agenewe, ari bo ba baturage kandi nabo bakayishyura, bikagabanya cya gihombo twaterwaga na Mubazi zidakora neza.”
Eugène Dusingizumuremyi, Umuyobozi wa Water for People mu Rwanda, avuga ko imashini zatanzwe zije gufasha ba Rwiyemezamirimo bacunga imiyoboro y’amazi mu bice by’icyaro kujya bamenya amazi za Mubazi z’abafatabuguzi b’amazi zibara, niba ari yo koko.
Agira ati: “Icyo izi mashini zije gukemura, ni kugira ngo ba Rwiyemezamirimo bakorera mu bice by’icyaro bazikoreshe mu kumenya Mubazi zidakora neza zisimbuzwe bityo bigabanye igihombo cy’amazi ashobora kunyura muri Mubazi zapfuye ntabarwe kandi yakoreshejwe.”
Imashini zatanzwe na Water for People zizafasha mu kugenzura ubuziranenge bwa Mubazi z’abafatabuguzi b’amazi mu Turere 10 aritwo; Rwamagana, Kayonza, Ngoma, Kirehe, Nyagatare, Ruhango, Nyanza, Nyamagabe, Ngororero na Nyabihu.
Muri utu Turere 10 hakorera ba Rwiyemezamirimo bafasha WASAC Group kugeza amazi meza ku baturege bagera kuri 13 ari bo; Ubuzima Bwiza MKM, Better Together, Water Ways, Patto Water, Ayateke, NG&WS, Aqua Management, Nibwo buzima, Axion Water, Home Praise, UF Realities, COWBE na REDEC.
Buri mashini mu mashini 10 zatanzwe, ifite agaciro k’Amadolari ya Amerika 1 000.
Umuyobozi wa Water for People akomeza avuga ko zidahenze ugereranije n’icyo zitezweho.
Yagize ati: “Muri rusange ntabwo izi mashini zihenze ugereranyije n’icyo zije gukemura kuko wasanga imwe ije kongera amafaranga yinjiraga arenze ayo yaguzwe kandi mu gihe gitoya.”
Imashini zipima ubuziranenge bwa Mubazi zatanzwe binyuze mu Mushinga ‘Isoko y’Ubuzima’ uterwa inkunga na Leta Zunze Ubumwe za Amerika, ugashyirwa mu bikorwa n’Umuryango Water for People ku bufatanye n’abafatanyabikorwa batandukanye.