Mu mateka y’isi habayeho abantu benshi bakoze ibintu bitangaje byatumye amazina yabo amenyekana hirya no hino. Muri abo harimo Umunya-Iran witwa Amou Haji, wamamaye kubera ubuzima budasanzwe yabayemo aho yamaze imyaka isaga 60 atiyuhagira, nta gitonyaga cy’amazi kimukoze ku mubiri.

Inkuru ye yaciye ibintu mu bitangazamakuru mpuzamahanga no ku mbuga nkoranyambaga, cyane cyane nyuma y’urupfu rwe rwabaye ku wa 23 Ukwakira 2022, afite imyaka 94.

Amou Haji yavukiye mu gace ka Dezh Gah, mu ntara ya Fars iri mu majyepfo ya Iran. Mu gihe benshi bamuzi nk’"umugabo w’umunyamwanda kurusha abandi ku isi", ubuzima bwe bwari bufite amateka yihariye.

Amakuru yatangajwe n’ibitangazamakuru byo muri Iran agaragaza ko akiri muto yahuye n’ibibazo bikomeye byamusize afite ihungabana rikomeye, bituma afata icyemezo cyo kwitandukanya n’abandi bantu no kubaho ubuzima bw’ubwigunge.

Kuva icyo gihe ntiyongeye kubaho nk’uko abandi babagaho, ahubwo yahisemo kuba mu butayu no kwirinda ibikorwa byinshi byafatwaga nk’ibisanzwe mu mibereho ya muntu.

Kimwe mu bintu byatumye amenyekana cyane ni uko yamaze imyaka isaga 60 atiyuhagira. Yemeraga ko amazi n’isabune byashoboraga gutuma arwara, bityo ahitamo kubyirinda burundu.

Mu gihe abantu benshi babonaga umubiri we wuzuye ivumbi n’umwanda, we yumvaga ari bwo buryo bwiza bwo kurinda ubuzima bwe. Uwo mwanzuro we watangaje benshi, ndetse utuma aba umwe mu bantu bavuzwe cyane ku isi kubera imibereho idasanzwe.

Nk’uko tubikesha ikinyamakuru Daily Mail, uretse kutiyuhagira, ubuzima bwa Amou Haji bwaranzwe n’ibindi bikorwa bitangaje. Yabaga mu mwobo yicukuye cyangwa mu kazu gato abaturage bo mu gace yabagamo baje kumwubakira kugira ngo agire aho yikinga.

Yagiraga imyambaro ishaje cyane kandi yanduye, akenshi ikaba yarangiritse kubera imyaka myinshi yari amaze ayambara. Abamuzi bavuga ko yari umuntu wakundaga kuba wenyine, atifuzaga kuvanga ubuzima bwe n’ubwa rubanda.

Imirire ye na yo yateye benshi urujijo. Amakuru avuga ko yakundaga kurya inyama z’inyamaswa zapfuye, cyane cyane izagongwaga n’imodoka cyangwa izapfuye zizize ibindi bintu bitandukanye.

Yanyweraga amazi mu gikoresho cy’icyuma gishaje kandi rimwe na rimwe yanywaga itabi mu buryo budasanzwe. Nubwo ibi byose byashoboraga gutuma benshi batekereza ko ubuzima bwe butari kumara igihe kirekire, yabayeho imyaka 94 yose.

Ubuzima bwa Amou Haji bwatangiye gukurura inyungu z’abahanga mu by’ubuvuzi n’abashakashatsi, bifuzaga kumenya uburyo umuntu ashobora kubaho imyaka myinshi muri ubwo buzima bafataga nk’amaburakindi.

Muri 2014, itsinda ry’abaganga bo muri Iran ryaramusuye riramusuzuma kugira ngo harebwe uko ubuzima bwe buhagaze. Ibyo babonye byatangaje benshi kuko, nubwo yari afite parasite ya trichinosis ishobora guterwa no kurya inyama zidatetse neza, nta ndwara zikomeye nka Virusi itera SIDA cyangwa hepatite basanze afite.

Abashakashatsi bavuze ko bishoboka ko umubiri we wari waramenyereye ubuzima yari abayemo, nubwo batigeze bavuga ko ubwo buzima ari bwiza cyangwa ko bwakurikizwa n’abandi.

Mu myaka ya nyuma y’ubuzima bwe, abaturage bo mu gace yabagamo bakomeje kugerageza kumwumvisha ko yakwiyuhagira. Nyuma y’igihe kinini abyanga, amaherezo yemeye koga bwa mbere nyuma y’imyaka irenga 60.

Icyo gikorwa cyakurikiwe n’urupfu rwe mu gihe kitari kirekire, bituma ku mbuga nkoranyambaga no mu bitangazamakuru bitandukanye hakwirakwira inkuru yavugaga ko kwiyuhagira ari byo byaba byaramuhitanye.

Icyakora, nta gihamya yemewe igaragaza ko kwiyuhagira ari byo byateye urupfu rwa Amou Haji. Nubwo yapfuye nyuma gato yo kwemera koga, abaganga ntibigeze batangaza ko ayo mazi ari yo yamuhitanye.

Ahanini, kuba yari ageze ku myaka 94 bituma ubusaza bufatwa nk’imwe mu mpamvu zishoboka z’urupfu rwe. Abahanga mu by’ubuvuzi bagaragaza ko kuba ibintu bibiri byabaye bikurikirana bidahita bisobanura ko kimwe ari cyo cyateye ikindi.

Nyuma y’urupfu rwe, inkuru ya Amou Haji yongeye kuvugwa cyane ku isi. Ibitangazamakuru byinshi byamwise "Umugabo usa nabi kurusha abandi ku isi", nubwo iryo zina ritaremerwa n’urwego urwo ari rwo rwose.

Ku mbuga nkoranyambaga, benshi bagiye bavuga ko urupfu rwe rwabaye isomo ryo kwerekana ko buri muntu agira ubuzima bwe bwihariye, mu gihe abandi bo bakomeje gukwirakwiza inkuru zivuga ko kwiyuhagira ari byo byamwishe.

Nubwo Amou Haji yabayeho ubuzima budasanzwe kandi bukomeje gutangaza benshi kugeza n’ubu, inzobere mu buzima zishimangira ko kutiyuhagira imyaka myinshi cyangwa kubaho mu mwanda bidatanga ubwirinzi bwihariye ku ndwara cyangwa ngo byongere imyaka yo kubaho.

Kuba yarabayeho imyaka 94 ni inkuru idasanzwe, ariko si gihamya y’uko imibereho nk’iyo ari yo ituma umuntu aramba. Ahubwo, amateka ye akomeza kwibukwa nk’urugero rw’umuntu wahisemo inzira yihariye y’ubuzima, ikamugira umwe mu bantu bavuzwe cyane ku isi kubera uburyo yabayemo butandukanye cyane n’ubwo abantu benshi basanzwe bazi.