Umwe mu barwanyi bari bakomeye mu Ntara ya Ituri, wari wariyise Jenerali “Hérode” yapfiriye mu mirwano umutwe w’abarwanyi yari ayoboye bahanganyemo n’ingabo za Congo, FARDC.

Kakani Tondabo Édouard, uzwi nka Hérode, wayoboraga umutwe w’abarwanyi biyise Front Patriotique et Intégrationniste du Congo (FPIC), yishwe mu ijoro ryo ku wa Gatatu rishyira ku wa Kane.

Kuri uyu wa Kane, mu gitondo humvikanaga urusaku rw’amasasu bya hato na hato mu gace kitwa Nyankunde n’inkengero zako ari naho uriya murwanyi yiciwe.

Ubushyamirane hagati y’umutwe w’abarwanyi be witwa FPIC n’ingabo za leta ya Congo, bivugwa ko bwaguyemo nibura abandi barwanyi be bamurindaga bagera kuri batandatu (6), nk’uko bitangazwa n’amasoko y’amakuru atandukanye.

Cyakora ingabo za Congo zahakanye ibyo kurwana n’umutwe w’abarwanyi wa FPICI, unazwi ku izina rya “Tchini ya Kilima”.

Mu itangazo ryasohowe n’ingabo za Congo ku wa Kane, tariki ya 16 Nyakanga 2026, FARDC yamaganye ibirego bishinja abasirikare bayo kugira uruhare mu byabaye mu ijoro ryo ku wa Gatatu, tariki ya 15 Nyakanga, i Nyankunde.

Umurambo w’uriya murwanyi witwa “Hérode” wajyanywe ku bitaro by’i Bunia.