Itangazo rikomeye ryatanzwe n’inama y’Abepisikopi Gatolika muri Repubulika Iharanira Demokarasi ya Congo, Conférence Épiscopale Nationale du Congo (CENCO), rirwanya umugambi wo guhindura Itegeko Nshinga ry’Igihugu ryasomwe kuri iki Cyumweru mu misa zitandukanye zabereye mu maparuwasi Gatolika yose yo mu gihugu.

Amakuru aturuka mu nzego za Kiliziya Gatolika muri Repubulika Iharanira Demokarasi ya Congo avuga ko iri tangazo ryagejejwe ku bakirisitu mu rwego rwo kubamenyesha no kubasobanurira impungenge z’abepisikopi ku bijyanye n’impinduka zishobora gukorwa ku Itegeko Nshinga.

Uretse mu maparuwasi yo muri RDC, iri tangazo ryasomwe no muri zimwe muri paruwasi z’Abanyekongo baba mu mahanga (diaspora), hagamijwe ko ubutumwa bwa CENCO bugera ku banyagihugu benshi bashoboka.

Bamwe mu bapadiri basomye iri tangazo banaryongeraho ibisobanuro mu ndimi zitandukanye zikoreshwa muri RDC zirimo Ikinyatshiluba, Igiswahili ndetse n’Ikinyarwanda, kugira ngo abakirisitu barusheho gusobanukirwa n’ubutumwa bukubiyemo.

Iri tangazo rije mu gihe impaka ku ihindurwa ry’Itegeko Nshinga zikomeje kuvugisha abatari bake muri RDC, aho impande zitandukanye zikomeje gutanga ibitekerezo byazo ku ngaruka cyangwa inyungu zishobora guterwa n’izo mpinduka.

CENCO ifite ijambo rikomeye mu mibereho ya politiki n’imibereho rusange muri RDC, kandi kenshi yagiye gitanga ibitekerezo ku bibazo bikomeye bireba igihugu n’ejo hazaza h’abaturage bacyo.