Umugaba Mukuru w’ingabo z’u Burundi, Gen Prime Niyongabo, yamenyesheje abasirikare bose bafite pasiporo zisanzwe cyangwa ibindi byangombwa bisabwa abajya mu mahanga, ko bagiye kubyamburwa.

Ubutumwa bwa Gen Niyongabo bwashyizweho umukono tariki ya 29 Mutarama 2026, bugenewe abayobozi b’imitwe yose y’igisirikare, buvuga ko nta musirikare w’u Burundi wemerewe gutunga pasiporo isanzwe cyangwa ibindi byangombwa by’inzira.

Yagize ati "Abasirikare bose b’u Burundi, icyiciro cyose barimo, baributswa ko hashingiwe mabwiriza agenga igisirikare, umusirikare atemerewe gutunga pasiporo isanzwe cyangwa ikindi cyangombwa kimwemerera kwambuka umupaka.”

Abasirikare bamenyeshejwe ko bemerewe gutunga pasiporo z’akazi gusa, bahabwa iyo bagiye mu butumwa mu mahanga, bisabwe n’ubuyobozi bukuru bw’igisirikare, kandi ko umusirikare nagira impamvu yihariye yo kujya mu mahanga, ubuyobozi bwe ari bwo buzajya bumusabira pasiporo isanzwe.

Gen Niyongabo yasabye abafite pasiporo zisanzwe ko bagomba kuzishyikiriza ubuyobozi bukuru bw’igisirikare bitarenze tariki ya 10 Gashyantare, kandi ko uzabirengaho azafatirwa ibihano hashingiwe ku mategeko agenga igisirikare cy’u Burundi.

Ati "Umusirikare wese ufite pasiporo isanzwe cyangwa ikindi cyangombwa kimwemerera kwambuka umupaka, agomba kubishyikiriza G1 ku cyicaro gikuru cya FDNB bitarenze tariki ya 10 Gashyantare 2026. Kubirengaho rizaba ari ikosa rizatuma uwarikoze ahanwa nk’uko biteganywa n’amategeko n’amabwiriza."

Igisirikare cy’u Burundi cyafashe iki cyemezo nyuma y’aho abasirikare benshi bagitorotse, bifashishije pasiporo zisanzwe bahawe n’abakozi b’urwego rwihariye rwa Polisi ruzwi nka ‘PAFE’. Bamwe muri bo bagiye mu bihugu birimo ibyo muri Aziya n’i Burayi, aho bakorera imirimo iciriritse.

Imbarutso yo gutoroka kw’abasirikare benshi yabaye intambara boherezwamo mu burasirazuba bwa Repubulika Iharanira Demokarasis ya Congo n’ubukene. Kubera ko bari bakeneye izi pasiporo cyane, bamwe muri bo bahaye ruswa abakozi ba PAFE kugira ngo bazibahe binyuze mu nzira y’ubusamo.

Mbere y’uko aba basirikare bahabwa pasiporo, basabwaga kubanza gushaka indangamuntu ziriho amazina atari ayabo, hanyuma byombi bigahuzwa kugira ngo bitazamenyekana ko bakorera igisirikare cy’igihugu.

Gen Niyongabo yamenyesheje abasirikare ko uzarenza tariki ya 10 Gashyantare ataratanga pasiporo ye, azahanwa