Ingabo z’u Rwanda ziri mu butumwa bw’amahoro muri Centrafrique mu gace ka Bria zizihije Umunsi Mpuzamahanga w’Abagore.

Ni igikorwa cyabaye ku wa 8 Werurwe 2026. Ingabo z’u Rwanda zifatanyije n’ingabo zo mu bindi bihugu ziri mu butumwa bw’amahoro hamwe n’abaturage bo mu Mujyi wa Bria mu kwizihiza uyu munsi.

Superefe mu Ntara ya Haute Kotto, Brahim Abdoulaye wari ahagarariye Guverineri yatanze ubutumwa bwibanze ku gufata ingamba zifatika zo guteza imbere uburenganzira bw’abagore, harimo kubafasha kubona serivisi z’ingenzi no kugera ku butabera.

Ubuyobozi bw’Ingabo z’u Rwanda bwatangaje ko “kwitabira kw’Ingabo z’u Rwanda ziri mu butumwa bw’amahoro mu kwizihiza uyu munsi bigaragaza ubushake bwo guteza imbere amahoro arambye no kurinda abasivile ihohoterwa iryo ariryo ryose.”

Mu gihe u Rwanda rukomeje gutera intambwe ifatika mu kubahiriza ihame ry’uburinganire hagati y’abagore n’abagabo, RDF nayo ntiyasigaye.

Mu 2007, mu gisirikare cy’u Rwanda hashyizweho ishami ryihariye rireba ibijyanye n’uburinganire n’ubwuzuzanye bw’abagore n’abagabo. Ni urwego rufite uruhare runini mu kwigisha abasirikare n’imiryango yabo ibijyanye no kurwanya no gukumira ihohoterwa rishingiye ku gitsina.

Rufasha mu guteza imbere uburenganzira bw’umugore no kubaka ubushobozi bw’umugore mu mirimo itandukanye. Abarugize bakangurira abakobwa kujya mu ngabo z’igihugu no mu butumwa bw’amahoro.

Imibare igaragaza ko kuva mu mwaka wa 2004, abagore barenga 1500 bamaze kujya mu butumwa bw’amahoro, aho nibura 260 babwoherezwamo buri mwaka.

Ingabo z’u Rwanda zifatanyije n’abandi basirikare bari mu butumwa bw’amahoro muri Centrafrique, mu kwizihiza Umunsi Mpuzamahanga w’Abagore

Gusabana n’abaturage biri mu byo Ingabo z’u Rwanda zishyira imbere aho ziri hose