Abaturage bo mu Busuwisi banze umushinga w’itegeko wari ugamije gushyiraho umubare ntarengwa w’abaturage miliyoni 10 igihugu kitagomba kurenza kugeza mu 2050.

Uyu mushinga wari watanzwe n’ishyaka Swiss People’s Party, SVP, washoboraga guhindura bikomeye politiki y’abimukira muri iki gihugu gisanzwe gifitanye umubano ukomeye n’Umuryango w’Ubumwe bw’u Burayi.

Ibyavuye mu matora byagaragaje ko 54,79% by’abatoye banze uyu mushinga, mu gihe 45,21% bawushyigikiye. Abitabiriye amatora bari 58,86%.

Iyo uyu mushinga uza kwemezwa, Guverinoma y’u Busuwisi yari gutegekwa gufata ingamba zikomeye zo kugenzura izamuka ry’abaturage, muri iki gihe bageze kuri miliyoni 9,1.

Mu gihe abaturage bari kuba bageze kuri miliyoni 9,5 mbere ya 2050, igihugu cyari gutangira gukaza amategeko ajyanye no guhuza imiryango, gutanga impushya zo gutura no kwakira abasaba ubuhungiro.

Ikindi cyari gikomeye kurushaho ni uko iyo abaturage barenga miliyoni 10 mbere ya 2050, u Busuwisi bwari gutegekwa kwikura mu masezerano y’imigenderanire bufitanye n’Umuryango w’Ubumwe bw’u Burayi.

Ibyo byashoboraga no gushyira iherezo ku burenganzira u Busuwisi bufite bwo kugera ku isoko rusange ry’u Burayi, ikintu cyari kugira ingaruka zikomeye ku bukungu n’isoko ry’umurimo.

Guverinoma y’u Busuwisi, igizwe n’abaminisitiri barindwi baturuka mu mashyaka ane akomeye, na yo yari yamaganye uyu mushinga. Yavuze ko washoboraga guhungabanya ituze ry’igihugu, kubangamira ubukungu no kugabanya uburumbuke bwacyo.

Amashyirahamwe y’abikorera na yo yari afite impungenge ko kugena umubare ntarengwa w’abaturage byari gutuma igihugu kibura abakozi b’abanyamahanga gikenera mu nzego zitandukanye.

Mu Busuwisi, abaturage bafite uburenganzira bwo gutangiza referandumu binyuze mu nzira ya demokarasi itaziguye, iyo icyifuzo runaka kibonye abagishyigikiye 100.000 mu gihe cy’amezi 18. Ni uburyo SVP imaze igihe ikoresha mu kuzamura impaka ku bibazo by’abimukira.